AINARO, 20 abril 2023 (TATOLI) – Partido os Verde de Timor (PVT) adia halo mini kampaña eleitorál ohin iha postu administrativu Maubisse no Hato-Udo, munisípiu Ainaro, tanba eklipse solár.
Komisáriu Polítika Nasionál PVT, Armindo Amaral, informa katak tuir kalendáriu husi Komisaun Nasionál Eleisaun (CNE, sigla iha português), PVT realiza iha postu administrativu Maubisse no Hato-Udo.
“Ohin ne’e lolos ami realiza kampãna, maibe iha mudansa oráriu, tanba akontese eklipse solár. Tanba ne’e, ohin partidu hotu-hotu la halo atividade”, dehan Armindo Amaral, ba Ajénsia Tatoli kinta ne’e.
Kestiona kona-ba bainhira mak realiza fali kampaña eleitoral iha postu rua ne’e, dirijente ne’e esplika “kestaun ne’e sei koordena fali ho CNE hodi deside fali oráriu kampaña iha Ainaro”.
Komisáriu ne’e haktuir, ezisténsia PVT laos atu kontra partidu seluk no líder nasionál sira, maibe hamriik atu funu hasoru dezempregu.
Armindo Amaral hatete bainhira PVT hakat liu barreira, kualker partidu bolu atu forma Governu, PVT nakloke, tanba hakarak implementa promesa sira iha kampaña eleitorál, liuliu atu haruka timoroan ba servisu iha rai liur.
“Mekanismu atu haruka Verdes nia ema ba servisu iha rai liur ne’e mai husi osan subvensaun partidu nian. Ami nia aliadu sira iha nasaun sanulu mak hein hela atu simu traballador 50.000 durante tinan lima”, nia promete.
Armindo Amaral haktuir aliadus Verdes hirak ne’e mak hanesan forsa partidária sira iha Austrália, Nova Zelándia, Korea-Súl, Japaun, Kanadá, Inglaterra, Repúblika Irlándia, Irlandia Norte, Eskósia no Suísa.
Notísia relevante: APMT aposta iha diversifikasaun ekonómika hodi subtitui Fundu Petrolíferu
Jornalista: Afonso do Rosário
Editora: Isaura Lemos de Deus
