iklan

ELEISAUN, MUNISÍPIU, VIQUEQUE

KHUNTO hakarak tau prioridade ba infraestrutura bázika

KHUNTO hakarak tau prioridade ba infraestrutura bázika

Prezidente Partidu KHUNTO, Armanda Berta dos Santos hato’o programa sira durante kampaña aberta iha kampu futeból, postu Viqueque Villa, domingu (23/04/2023). Imajen Tatoli/Vitorino Lopes da Costa

VIQUEQUE, 23 abríl 2023 (TATOLI)—Partidu K’manek Haburas Unidade Nasionál Timor Oan (KHUNTO) ho númeru sorteiu 05 hakarak tau prioridade ba área infraestrutura bázika.

Militante no simpatizante Partidu KHUNTO entuziasmu partisipa kampaña aberta maski udan, iha kampu futeból, postu Viqueque Villa, domingu (23/04/2023). Imajen Tatoli/Vitorino Lopes da Costa

“Ba Eleisaun Parlamentár ida-ne’e, bainhira ami manán sei tau prioridade ba infraestura bázika liga ba aldeia, suku no postu atu nune’e povu bele asesu tanba agora ita haree kondisaun dalan sempre difikulta ba povu. Ho ida-ne’e Partidu KHUNTO hakarak hadi’a infraestrutura sira iha Timor laran hodi fasilita povu,” Prezidente Partidu KHUNTO, Armanda Berta dos Santos, hateten durante kampaña iha kampu futeból, iha postu Viqueque Villa, domingu ne’e.

Aleinde ne’e, partidu ne’e hakarak tau prioridade mós ba setór saúde, edukasaun, no turizmu.

“Ho programa sira-ne’e, karik povu fó fiar ba ukun iha IX Governu mak sei kria buat di’ak. Nune’e mós sei tau importásia ba joven sira tanba joven maka futuru nasaun. Tanba ne’e, loron 21 maiu 2023 keta haluha hili Partidu KHUNTO hodi hadi’a povu nia moris no nasaun,” nia akresenta.

Notísia relevante : KHUNTO hakarak promove liután relasaun internasionál

Militante no simpatizante Partidu KHUNTO partisipa kampaña aberta iha kampu futeból, postu Viqueque Villa, domingu (23/04/2023). Imajen Tatoli/Vitorino Lopes da Costa

Iha fatin hanesan, Konselleiru másimu Partidu KHUNTO, José dos Santos ‘Naimori Bukar, husu ba militante no simpatizante sira iha munisípiu Viqueque hodi hadomi malu no hadomi rai ida-ne’e.

“Ha’u hakarak ita jerasaun foun tenke kria unidade atu timor-oan hotu bele moris hakmatek, haluha pasadu, no haree ba futuru. Saida maka ita sei halo ba joven sira no ba rai ida-ne’e polítika labele soran malu,” Naimori fó hanoin.

Kampaña aberta ne’e hahú iha tuku 14:00 to’o 17:00, ne’ebé hetan partisipasaun hosi militante no simpatizante hosi postu Lacluta, Viqueque Villa, Uatulari, Ossu no Uatucarbau.

Atividade ne’e hetan seguransa másimu hosi Polísia Nasionál Timor Leste (PNTL) munisípiu Viqueque no akompañamentu hosi Komisaun Nasionál Eleisaun (CNE, sigla portugés) inklui observadór nasionál no internasionál.

Jornalista     : Vitorino Lopes da Costa

Editora          : Julia Chatarina

 

iklan
iklan

Leave a Reply

iklan
error: Content is protected !!