AINARO, 23 abríl 2023 (TATOLI) – Ko-Lideransa Partidu Frente Revolusionária Timor-Leste Independente (FRETILIN), Lere Anan Timur, afirma partidu ho númeru sorteiu 11 ne’e tenki manán iha eleisaun parlamentár 2023 hodi kombate injustisa sosiál.
“Atu lori moris di’ak ba povu, FRETILIN tenki ukun hodi kombate familiarizmu, korrupsaun, krime no injustisa. FRETILIN la’os partidu ida ne’ebé atu haki’ak ema naok ten sira no ema ne’ebé buka deit kadeira, maibé ukun atu serví nasaun”, Lere hato’o promesa ne’e iha kampaña aberta ba loron datoluk, iha kampu futeból munisípiu Ainaro, domingu ne’e.
Tuir Lere Anan Timur, bainhira FRETILIN ka’er ukun, sei ejije no husu ba ministru ida-idak atu tau matan ba povu no sei la permite membru Governu sira lao livre hodi abandona sira nia responsabilidade.
“FRETILIN tenki kombate familiarizmu, korrupsaun, neportismu, abuzu poder no injustisa. Ita tenki halakon buat sira ne’e atu povu labele sai vítima”, nia kompromete.
Lere observa katak veteranu sira iha Timor-Leste barak mak sente laran moras ho lei pensaun vitalísia ne’ebé fó de’it benifísiu ba grupu balu.
“Veteranu sira ohin loron laran moras duni, tanba pensaun vitalísia, ida ne’e injustisa ba sira ne’ebé luta durante tinan 24 laiha direitu ba pensaun vitalísia, sira ne’ebé ba tur iha Parlamentu tinan lima de’it simu pensaun vitalísia”, nia lamenta.
Kampaña ho tipu komísiu ne’e realiza no hetan seguransa másimu hosi Polísia Nasionál Timor-Leste (PNTL) munisípiu Ainaro, superviziona direta husi Komisaun Nasionál Eleisaun (CNE-sigla portugés).
Hafoin termina kampaña Lere ho Komitiva kontinua desloka ba Díli. Tuir oráriu ne’ebé aprova hosi CNE nasionál, Lere sei fila fali mai munisípiu Ainaro iha loron 02/05 hodi halo kompromisu eleitorál, iha postu administrativu Maubisse.
Notísia relevante: FRETILIN manán sei halo estudu sosiál no ekonómiku
Jornalista: Afonso do Rosário
Editora: Isaura Lemos de Deus
