CASDT sei koordena ho CCITL promove no regula atividade komersiál
MANATUTO, 24 abríl 2023 (TATOLI)—Partidu Centro Ação Social Democrático Timorense (CASDT), Norberto Saturnino Rodrigues, hateten bainhira povu Manatuto fó fiar hodi lidera IX Governu mak CASDT sei koordena ho Centro Comércio Indústria Timor-Leste (CCITL) hodi promove no regula atividade komersiál hotu-hotu iha Timor-Leste.
Notísia Relevante: Partidu CASDT sei fó prioridade ba dezenvolvimentu rurál
“Servisu hamutuk ho CCITL hodi promove no regula atividade komersial iha rai-laran,” nia hateten ba Agência Tatoli liuhosi telefónika, segunda ne’e.
CASDT foka ba formasaun profísionál hodi harii fasilidade formasaun no dezenvolve rekursu umanu ne’ebé kualifikadu ba empregu dignu iha rai-laran no diáspora.
Sei harii sentru Empregu no kría Matadalan Profisionál no konsellu empregu iha munisípiu 13 inklui Rejiaun Administrativa Espesiál Oé-Cusse Ambeno (RAEOA), hodi promove polítika nasionál atu hasa’e oportunidade formasaun tékniku profisionál nian.
Ida-ne’e, presiza iha emprezariál mak tenke kria kondisaun no fó protesaun ba empreza nasionál hodi partisipa másimu iha atividade emprezariál nasionál no rejionál, hodi kapitaliza empreza nasionál atu bele kompete ho empreza internasionál.
Nune’e, CASDTL sei promove sertifikasaun kualidade internasionál ba produtu agrikola hodi hetan valór akresentadu iha merkadu internasionál.
“Tanba dezenvolve infraestrutura atu masimiza rai produtivu abandonadu sira hodi bele fó produsaun foos no aihan lokál ba konsumu iha rai-laran no esporta ba rai-li’ur hanesan timoroan nia produtu hanesan kafe, vanilla, kaiju no seluk tan. Ida-ne’e tenke hetan prioridade másimu, pelumenus 99% hosi aifuan no modo, seluk kuda iha rai-laran hodi konsumu no esportasaun,” nia hateten.
Kona-ba peska, nia hateten, setór peska tenke sai baze nutrisionál hodi mitiga mánutrisaun iha rai-laran.
“Introdús teknólojia foun hodi apoia atividade peska no promove produtu tasi laran atu hetan valór komersiál aas, hanesan haki’ak budu tasi, boek, kadiuk, siput no seluk tan hodi Esporta ba rai-li’ur. Transforma peska tradisionál ba indústria hodi koloka produtu tasi Timor iha merkadu internasionál ho benefísiu ba supply,” nia dehan.
Jornalista : Osória Marques
Editór : Cancio Ximenes
