DILI, 24 abríl 2023 (TATOLI)—Komisaun Nasionál Eleisaun (CNE, sigla portugés) haruka ona karta ba partidu polítiku hotu ne’ebé partisipa iha Eleisaun Parlamentár 2023 hodi partisipa debate públiku ne’ebé sei realiza iha tempu badak.
“Estratejia partidu nian la’ós tenke Sekretáriu Jerál ka Prezidente ka sé mak mai, importante partidu iha direitu iha palku hodi debate maibé debate ne’e ema ida tenke domina asuntu ne’ebé iha, entaun partidu livremente atu hili sé mak atu mai, karik prezidente partidu mak mai liu-liu Xanana Gusmão, Lú Olo, no Marí mak ne’e ita agradese, maibé bainhira sira la mai no haruka reprezentante mós nafatin reprezenta partidu tanba partidu la’ós ema ida nian de’it,” Prezidente CNE, José Belo hateten liuhosi konferénsia imprensa, iha salaun CNE, segunda ne’e.
Notísia relevante CNE sei hapara partidu polítiku sira-ne’ebé realiza mini-kampaña sein koñesimentu:
Nia dehan, bainhira Prezidente partidu ida la partisipa mós debate kontinua la’o, importante maka reprezentante partidu ne’e marka prezensa no hato’o vizaun partidu klaru.
“CNE konvida partidu hotu, espera sira hotu partisipa hodi hato’o hanoin no vizaun ba oin. Daudaun iha kampaña sira hato’o programa no asuntu nasionál hanesan mina no Ró Haksolok. Iha debate ne’ebé sei hala’o tuir mai, sé mak atu ko’alia espesífiku ba asuntu rua ne’e mós CNE la bandu maibé tempu nafatin limita no hakarak ko’alia fali asuntu seluk mós bele,” nia esplika.
CNE prepara ona pergunta ba debate ho partidu hotu la’ós ba de’it partidu sira ne’ebé hakarak atu debate.
“Matéria kona-ba interese nasionál no povu nia di’ak, ita buka atu hatene maibé ninia formula pergunta ne’e la’ós tanba partidu FRETILIN hatama. CNE iha ekipa rasik hodi estuda no haree kontestu hosi pergunta. Tanba ne’e CNE la persiza halo tuir ema ida ka rua ninian,” nia tenik.
Jornalista : Antónia Gusmão
Editora : Julia Chatarina
