DILI, 24 abríl 2023 (TATOLI) – Partidu Os Verdes de Timor (PVT) hatuur ninia programa prioridade ida maka sei harii sentru formasaun adekuadu partidu nian iha munisipiu Aileu hodi fó formasaun ba joven dezempregu sira atu prepara-aan ba futuru.
Prezidente PVT, António Lela Hunu da Cruz, hateten partidu ne’e hamriik hodi promete serbisu ba joven dezempregu rihun 50, tanba ne’e vota ba verde hodi asentu iha Parlamentu Nasionál atubele hetan legalidade hodi lori sira ba futuru ida di’ak liu.
“Ita la preokupa atu bá tuur iha Governu, ita preokupa mak implementasaun programa no prontu atu viabiliza, tanba ita laiha problema ida ho partidu 16 ne’e, liuliu ho FRETILIN no CNRT tanba verde hakarak lori joven sira sai hosi problema dezempregu nia laran”, António Lela Hunu hatete iha mini kampaña iha kampu futeból Taibessi, segunda ne’e
Dirijente partidu ne’e reitera katak atubele harii sentru formasaun adekuada ida iha Aileu hodi lori joven sira enkaixa aan iha formasaun profisionál maka nia rezultadu sei fó sai iha eleisaun 21 maiu.
“Bainhira partidu hetan asentu iha Parlamentu Nasionál sei hetan mós osan subvensaun públika no osan sira ne’e maka verde sei utiliza hodi harii sentru formasaun ba joven dezempregu sira, nune’e bele hetan formasaun profisionál durante tinan lima nia laran tanba asset verde nian maka joven dezempregu no abandona eskola sira”, nia afirma.
Tanba ne’e, nian husu ba militante no apoiante sira atu kontinua konvense joven sira tantu feto ka mane atu iha eleisaun bele vota ba verde hodi lori PVT alkansa ninia programa ba tinan lima nia laran.
“Atu alkansa programa prioritáriu ba joven dezempregu sira, PVT presiza liu maka tenke liu barreira hodi hetan kadeira lima to’o hitu, nune’e osan subvensaun públika atu utiliza hodi liberta verde nian oan sira ne’ebé barak loos sei dezempregu hela”, nia dehan.
Ba líder PVT ne’e katak sé de’it mak kaer ukun verde prontu fó nia kontribuisaun. “Tanba PVT hamriik hosi joven ain-tanan sira. Ne’e duni, Governu ne’ebé de’it maka kaer ukun tenke pró ba joven dezempregu sira, tanba luta ne’ebé verde halo ba sira ne’e haree mós ba luta ba planeta no luta ba ambiente. Ne’e duni Governu ne’ebé de’it tenke defende planeta no ambiente nasaun ida ne’e nian”, nia realsa.
Partidu Os Verdes kompromete mós bainhira liu barreira iha eleisaun tinan ida ne’e sei fó prioridade hodi valoriza direitu ema ho defisiénsia (EhD) hodi hetan kadeira primeiru nu’udar deputadu iha Parlamentu Nasionál.
Kompromisu polítiku ida ne’e PVT halo ona ba EhD sira tanba konsidera direitu sira ne’e konsagra ona iha Konstituisaun iha artigu 16 no 21.
Mafalda Fernandes Gusmão nu’udar ema ho defisiénsia ne’ebé hato’o ninia deklarasaun polítika iha kampaña PVT nian katak partidu fó previléziu ida ba EhD no lahalo diskriminasaun ba sira-nia direitu.
“Ha’u la mai mesak, maibé mai ho ha’u nia maluk defisiénsia na’in-lima. Ami konsidera hetan previléjiu boot tebes hosi Partidu Os Verdes de Timor no desizaun Prezidente António Lela Hunu da Cruz tanba bele entrega kadeira dahuluk ba ema ho defisiénsia”, dehan Mafalda Fernande iha ninia intervensaun polítika iha kampaña.
Nia dehan desizaun polítika ida ne’e la’ós karidade, maibé oportunidade ida ba EhD hodi prienxe kadeira iha Parlamentu Nasionál.
Nia konsidera Partidu Os Verdes kumpre sira-nia promesa no sei la tau EhD hanesan amostra ka atu hetan votu de’it, maibé hakarak hatudu katak nia matak no buras ne’e mai duni hosi ema mukit liu buat hotu-hotu mak EhD sira.
Teknolojia no dezenvolvimentu ne’ebé maka la’o iha mundu halo ema ho defisiénsia sira mós agora hetan oportunidade hanesan tuir buat ne’ebé konsagra ona iha artigu 16 katak ema hotu iha direitu hanesan, inklui artigu 21 ne’ebé fó mós protesaun boot ba EhD hodi partisipa iha dezenvolvimentu nasun ida ne’e.
Tanba ne’e ho apoiu juventude sira-nian, liuliu militante no apoiante sira tomak nia votu mak sei fó oportunidade ba EhD sira bele mós hetan oportunidade.
Notísia relevante: Partidu os Verdes kompromete halais implementasaun poder lokál no desentralizasaun administrativa
Jornalista: Tomé Amado
Editora: Maria Auxiliadora
