Partidu CNRT apela timoroan mantein pás no estabilidade
DILI, 24 abríl 2023 (TATOLI)—Prezidente Konsellu Diretivu Nasionál hosi Partidu Congresso Nacional da Reconstrução Timorense (CNRT), Dionísio Babo, apela ba timoroan hotu liuliu militante no simpazante partidu nian atu mantein pás no estabilidade iha prosesu kampaña eleitorál to’o loron eleisaun parlamentár iha 21 maiu 2023.
Notísia Relevante: PNTL Viqueque buka tuir ema deskoñesidu tuda militante CNRT
“Ami hakarak apela dala ida tan ba timoroan hotu, liuliu ba simpatizante no militante CNRT nian iha Timor laran tomak atu mantein nafatin pás no estabilidade no mós mantein atu prosesu kampaña eleitorál to’o rohan,” Prezidente KDN hosi partidu CNRT ne’e hateten liuhosi konferénsia imprensa ba jornalista sira iha sede partidu CNRT Bairru dos Grillos, segunda ne’e.
Ekipa nasionál partidu CNRT iha nasionál mós halo hela akompañamentu hotu ne’ebé organiza hodi CNE serbisu makaas hela ba prosesu eleisaun nian iha 21 maiu, liuliu halo preparasaun fiskal hodi halo fiskalizasaun forte tebes.
Nune’e, nia husu ba órgaun eleitorál no parte autoridade seguransa atu aseugra nafatin situasaun hakmatek ba populasaun, liu-liu iha periódu kampaña eleitorál movimentasaun militante sira makaas tebes hodi garante nafatin seguransa.
“Tanba ne’e, ami hakarak husu órgaun kompetente hanesan órgaun polisiál no eleitorál, favór ida atu nafatin seguransa metin hodi hasees tiha ema sira-ne’ebé la komprende demokrásia ka adversáriu ne’ebé hanoin intensaun aat, atu ita mantein nafatin pás no estabilidade iha ita-nia rai nu’udar nasaun ida-ne’ebé iha internasionalmente no rejionál koñesidu hanesan nasaun mais demokrátiku,” nia hateten.
Partidu CNRT nia programa kampaña eleitorál sei taka iha Dili no durante prosesu tomak nia formatu komisaun nian iha tipu haat hanesan komísiu, mini kampaña ne’ebé halo iha postu administrativu, diálogu ne’e iha baze no ikus mak door-to-door (tama uma sai uma) ne’ebé rejista tuir lei haruka.
Entretantu, tuir kalendáriu hosi órgaun eleitorál iha loron segunda ne’e, partidu CNRT hala’o kampaña ho tipu mini kampaña tuku 16h00-18h00 iha postu administrativu Laga, munisípiu Baucau.
Notísia Relevante: CNRT hakarak hadi’a ekonomia rai-laran
Jornalista : Nelson de Sousa
Editór : Cancio Ximenes
