PLPA prioritiza loke indústria Tabaku iha Balibo
BALIBO, 24 abríl 2023 (TATOLI)-Partidu Libertasaun Povu Aileba (PLPA) númeru sorteiru (3), segunda ne’e halo kampaña eleitorál ho tipu diálogu, iha aldeia Lalis, suku Cova, postu administrativu Balibo, munisípiu Bobonaro, promete prioritiza loke indústria Tabaku iha Balibo.
Sekretáriu Jerál PLPA, António Freitas, hateten presiza tau prioridade indústria refere tanba suku Cova no suku sira-ne’ebé iha postu Balibo hanesan rai produtivu no iha potensialidade ba Tabaku ne’ebé koñesidu dezde uluk to’o agora.
Notísia relevante: Fenómenu eklipse solár afeta ba PLPA kansela kampaña iha Turiscai
“Ami iha hanoin ona, sé PLPA povu Timor-Leste fó konfiansa sei halo Indústria Tabaku iha postu Balibo, hodi mellora agrikultura, liuliu setór sira-ne’ebé halo produsaun ba Tabaku, nune’e abitante lokál sira bele hetan rendimentu no joven dezempregu bele serbisu iha indústria ida-ne’e,” nia informa ba jornalista sira hafoin hala’o diálogu.
Tanba indústria Tabaku ne’e ba futuru povu bele hetan rendimentu per-kapita di’ak ba no haforsa ekonomia família ho di’ak, hanesan governu iha reponsablidade atu trata ho di’ak, liuliu iha asepeitu ekonomia.
Enkuantu PLPA mós sei tau prioridade ba infraestrutura bázika sira hanesan bee-moos, eletrisidade, estrada no esdukasaun tanba povu iha suku refere iha liu área rurál to’o agora seidauk asesu ba kondisaun hirak-ne’e.
Tanba e’e husu ba militante no simpatizante sira iha suku Cova atu fó konfiansa ba PLPA iha eleisaun parlamentár, 21 maiu 2023 nune’e bele implementa programa hirak-ne’e.
Koordenadór PLPA suku Cova, Benjamin dos Reis, promote sei esforsu maka’as iha baze hodi mobiliza militante sira atu vota ba PLPA nune’e bele responde preokupasaun povu nian bainhira kaer ukun.
Tamba iha tinan lima ba kotuk partidu polítiku balun ba halo promesa maibé kaer Ukun la realiza até agora no povu kontinua halerik ba bee-moos no eletrisidade.
Potensialidade ne’ebé suku ne’e iha mak hanesan; Tabaku, Fore-mungu, Batar no Malus no produtu lokál sira seluk tán.
Notísia relevante: PLPA la konsege halo komísiu iha Aileu tanba laiha preparativu maibé ‘’door to door’’
Jornalista: Sergio da Cruz
Editór: Evaristo Soares Martins
