Administradór preokupa ho postu saúde Soibada laiha doutór
MANATUTO, 25 abríl 2023 (TATOLI)—Administradór postu administrativu Soibada, munisípiu Manatuto, Luis Gonzaga da Costa, hateten nia partepreokupa ho postu saúde Soibada ne’ebé to’o agora doutór laiha atu atende komunidade ne’ebé moras.
Notísia Relevante: Administradór Soibada husu Governu hadi’a estrada
“Ami preokupa tebes tanba iha postu saúde ne’e doutór laiha, tanba ne’e parte relevante haree no koloka mós doutór ida mai iha ne’e, nune’e bele atende moras grave sira,” nia hateten ba Agência Tatoli liuhusi telefónika, sesta ne’e.
Tanba, tuir nia, durante ne’e pasiente grave sira tenke lori ba munisipál no nasionál, tanba iha ne’e só iha de’it mak parteira no enfermeira entaun ida-ne’e sufisiente.
“Uluk iha maibé sira dada tiha fali ba Hospitál Nasionál Guido Valadares, ami la hatene problema saida nein ami hatene. Ida-ne’e ami preokupa tebes. Husu dala ida tan postu saúde Soibada presiza doutór, nune’e bele atende ami,” nia hateten.
Nia dehan, postu administrativu Soibada presiza iha doutór ida, nune’e bele konsulta ema moras grave sira.
Kona-ba ambulánsia, nia hateten, postu saúde iha ambulánsia multifunsaun ida-ne’ebé mak sufisiente ona hodi atende pasiente.
“Ambulánsia multifunsaun ne’e di’ak no sufisiente ona ba ami, inklui ami-nia postu saúde ne’e kompleta ona ho nia fasilidade,” nia dehan.
Jornalista : Osória Marques
Editór : Cancio Ximenes
