DILI, 25 abríl 2023 (TATOLI)–Komisaun Nasionál Eleisaun (CNE, sigla portugés) deside ona loron debate públiku ba partidu polítiku 17 ne’ebé konkorre iha Eleisaun Parlamentár 2023.
“CNE esplika ona planu ba partidu polítiku sira, katak iha loron 16 to’o 18 maiu sei iha debate. Debate ne’e iha nível partidu ko’alia kona-ba joventude feto no la taka dalan katak reprezentante sira ne’ebé partidu haruka mai mak hanesan joven, feto ka líder partidu. Debate ne’e realiza durante loron-tolu, ne’ebé loron ikus partisipa hotu hosi partidu 17 para sira koñese malu di’ak liután,” Prezidente CNE, José Belo, hateten iha ámbitu reuniaun ho partid polítiku sira, iha salaun CNE, Caicoli, tersa ne’e.
Notísia relevante : CNE disponibiliza reprezentante partidu domina asuntu partisipa iha debate
Parte CNE no Rádio Televizaun Timor-Leste, Empreza Públika (RTTL, E.P) iha ona konkordánsia katak sei realiza debate iha salaun Mahoka no RTTL, E.P mak sei transmite direta programa ne’e.
“Daudaun preparasaun la’o hela, téknikamente pergunta ami elabora hela, no pergunta sira ne’e mai hosi instituisaun Estadu, ne’ebé ita sei halo debate ida furak. Matéria debate kona-ba Estadu, Konstituisaun RDTL no perspetiva ba oin,” nia akresenta.
CNE sei halo selesaun ba moderadór sira ne’ebé modera debate juventude feto, ne’ebé moderadór sira ne’e mak hanesan Titi Ribeiro, Koko Valente, Paula Rodrigues, António Dias, no Espedito Dias.
CNE sei halo teste ba moderadór sira hafoin deside na’in-rua lori programa debate.
Jornalista : Antónia Gusmão
Editora : Julia Chatarina
