VIQUEQUE, 25 abríl 2023 (TATOLI)—Doutór espesialista matan hosi Hospital Nacional Guido Valadares (HNGV) fó konsulta matan no halo operasaun ba abitante iha Ospitál Internamentu munisípiu Viqueque Villa, durante loron-tolu, hahú segunda (24/04).
“Ohin ami kontinua halo atendimentu to’o kinta maka foin fila, hahú horiseik ne’e ami haree pasiente hosi ferik katuas no labarik barak maka mai halo tratamentu matan. Konsulta matan ne’e ami halo ba ema hotu ne’ebé hakarak mai konsulta matan haree la moos,” Xefe Unidade Matan hosi HNGV, Virgílio da Costa Pinto informa, tersa ne’e.
Notísia relevante : HNGV selebra “World Patient Safety Day” ho konsulta matan gratuita
Aleinde ne’e, Doutór sira koko pasiente sira-nia matan la moos hodi oferese oklu ho folin $1, $2 to’o $6 tuir nesesidade pasiente.
Tuir dadús, hahú segunda resjista pasiente ho matan haree la moos na’in-50 no halo operasaun matan katarata na’in-15.
“Ami haree ema ho idade 40 ba leten mak mai konsulta barak. Antes ne’e ami halo ona konsulta iha Viqueque, depois mosu COVID-19 maka ami la mai halo konsulta, agora maka fó konsulta ba abitante sira,” nia akresenta.
Nune’e, Xefe Unidade konvida abitante lokál ne’ebé haree la moos bele hakat ba konsulta ho Doutór espesialista matan tanba programa ne’e realiza tanba hetan suporta hosi parseiru sira ba atendimentu tinan-ida dala-ida.
Iha fatin hanesan, Pasiente matan, Rodolfo Soares, agradese no haksolok tanba bele halo tratamentu matan.
“Ohin ha’u mai konsulta matan ne’ebé uluk ai-moruk kona halo matan sorin parte loos sai mutin. Ha’u agradese ba Doutór sira bele atende ha’u,” nia dehan.
Konsulta matan ne’e hahú dadeer to’o lorokraik no Doutór espesialista hamutuk neen mak halo atendimentu.
Jornalista : Vitorino Lopes da Costa
Editora : Julia Chatarina
