MANATUTO, 25 abríl 2023 (TATOLI)—Komisáriu Polítika Nasionál Partidu Ação Social Democrático Timorense (CASDT), Norberto Saturnino Rodrigues, hateten bainhira povu fó fiar atu kaer ukun mak partidu CASDT planeia atu harii klínika iha postu administrativu Laclubar tanba setór saúde sai kestaun boot ba komunidade iha fafin refere.
Notísia Relevante: CASDT sei koordena ho CCITL promove no regula atividade komersiál
“Bainhira povu Laclubar fó fiar ba CASDT mak ami planeia sei harii klinika no tau pesoál saúde sira iha klínika iha aldeia, nune’e pasiente bele hetan tulun hosi pesoál saúde antes ba postu saúde to’o nasionál,” Norberto Saturnino Rodrigues hateten ba Agência Tatoli liuhosi telefónika, tersa ne’e.
CASDT bainhira hetan vitória iha eleisaun lejizlativa, nia dehan, sei tau prioridade ba asuntu saúde ne’ebé foka liu ba harii klínika iha aldeia.
“Ami tenke tau prioridade ba sentru saúde iha postu Laclubar tanba realidade ne’ebé ami haree iha postu ne’e susar tebes, nune’e ami hakarak harii sentru saúde hodi atende pasiente,” nia hateten.
Aleinde ne’e, CASDT mós hakarak sosa ambulánsia no mínimu iha klínika, nune’e bele fasilita pasiente tanba iha aldeia dala barak pasiente iis kotu tanba menus ambulánsia.
Nia hateten, postu saúde iha suku ida-idak tenke funsiona tuir padraun hanesan médiku ida, enfermeiru rua no parteira rua, hodi hatán ba povu nia halerik ba moras sira, no suku hotu-hotu iha Timor tenke iha postu saúde ida, hodi lori saúde hakbesik liu ba povu.
“Harii Ospitál Munisipál ba iha munisipiu hotu hodi bele atende ita-nia povu sira-ne’ebé hetan moras no hamenus movimentu dook mai Dili. Hari Hospitál espesializada ida iha Timor hodi tau matan ba moras kroniku sira no la presiza halo transferénsia ba rai-li’ur,” nia hateten.
Jornalista : Osoria Marques
Editór : Cancio Ximenes
