ERMERA, 25 abríl 2023 (TATOLI) – Partido Os Verdes de Timor (PVT) kompromete sei realiza desentralizasaun podér iha munisípiu hotu hodi estabelese asembleia munisipál.
Prezidente PVT, António Lela Huno hateten iha ninia intervensaun iha kampañia polítika iha Munisípiu Ermera katak karik PVT kaer pasta governu mak sei estabelese podér lokál.
“Desentralizasaun la’ós de’it administrativa, maibé desentralizasaun polítika, no desentralizasaun finanseíra. Desentralizasaun polítika ne’e maka povu tenke hili prezidente no asembleia munisipál rasik,” Líder másimu PVT hato’o kompromisiu ne’e iha Munisípiu Ermera, Salaun Parokiál Glenu, tersa ne’e.
António husu ba militante no simpatizante PVT atu vota ba verdes hodi realiza kompromisu refere liuhusi kria rezolusaun iha Parlamentu nasionál.
“Ita iha instrumentu jurídiku ida ne’ebé mak ita bele uza ‘referendum’. Sidadaun hotu-hotu bele propoin ba Prezidente Repúblika atu deklara lalais prosesu referendum ba asembleia munisipál,” António esplika.
Nia akresenta PVT hakarak promove munisípiu hotu. “Hamutuk ita sei eziji ba ita-nia aman Prezidente Repúblika atu lalais aselera prosesu ba estabelesimentu eleisaun asembleia munisipál.”
Líder PVT ne’e mós hateten, populasaun Ermera labele hein tán tinan lima mai mak foin estabelese asembleia munisipál.
“Os Verdes sei eziji governu ida mai ne’e, atu aselera prosesu kriasaun ba desentralizasaun podér lokál,” António konklui.
Entertantu, durante kampaña dialógu ne’e, sekretáriu jerál PVT, Santana Martins hato’o mós programa prinsipál PVT nian, hodi kompete iha eleisaun parlamentár tinan ne’e.
Programa hirak ne’e mak hanesan Aselera desentralizasaun podér lokál; edukasaun no informasaun (investe iha pré-eskolár, eskola tékniku vokasionál, no formasaun profesionál); Saúde (kuidadu saúde primária, sekundária no terseiru); inkluzaun sosiál, protesaun sosiál no solidaridade; infraestrutura (avansa ho sidade verdes); agrikultura, pekuária, peskas no florestas; Turizmu (dezenvolve turizmu komunitária, turizmu ekolóziku, turizmu aventura, turizmu relijiozu, turizmu istóriku, turizmu kulturál no etnográfiku); komérsiu no indústria; reforsa setór finanseiru; ikusliu mak kompromisu kontinua apoiu projetu tasi mane.
Jornalista : Filomeno Martins
Editora. : Nelia Borges
