DILI, 26 abríl 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu dekretu-lei, ne’ebé aprezenta hosi Ministru Ensinu Superiór Siénsia no Kultura, Longuinhos dos Santos, kona-ba Komisaun Nasionál Organizasaun Nasaun Unida ba Edukasaun, Siénsia no Kultura (UNESCO, sigla inglés).
“Objetivu diploma ne’e atu substitui Komisaun Nasionál UNESCO Timor-Leste nian. UNESCO anteriór ba servisu públiku sentrál administrasaun direta Estadu ne’ebé foun dependente ba membru Governu foun ne’ebé responsável ba área kultura nian,” Ministru Prezidénsia Konsellu Ministru, Fidelis Leite Magalhães hateten hafoin reuniaun ezekutivu, iha Palásiu Governu, kuarta ne’e.
Notísia relevante : KNTL-UNESCO prevee millaun $1 hodi harii sentru komunitáriu aprendizajen 15
Dekretu-lei ne’e ho objetivu atu define estrutura orgánika interna foun no posibilita envolvimentu boot hosi Governu ba funsionamentu no atividade komisaun.
Komisaun Nasionál UNESCO Timor-Leste ho nia misaun maka atu fó apoiu no dezenvolvimentu programa no realizasaun iha territóriu nasionál hodi buka atu envolve sidadaun no organizasaun nasionál sira iha melloria kompriensaun ba malu entre povu no promosaun ba justisa, dame no seguransa internasionál.
Jornalista : Antónia Gusmão
Editora : Julia Chatarina
