Top

Governu regula medida protesaun ba timor-oan iha rai-li’ur

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (26/04). Imajen Tatoli/Francisco Sony

DILI, 26 abríl 2023 (TATOLI)—Governu liuhosi reuniaun Konsellu Ministru, kuarta ne’e, aprova projetu dekretu Governu, ne’ebé aprezenta hosi Ministra Negósiu Estranjeiru no Kooperasaun, Adaljiza Albertina Xavier Reis Magno, hodi regula medida protesaun sidadaun timor-oan iha rai-li’ur.

“Dekretu Governu ida-ne’e halo regulamentasaun ba medida protesaun timor-oan sira iha rai-li’ur, prevee iha dekretu-lei númeru 77/2022, loron 26 outubru, ne’ebé permite aplikasaun ba parte servisu administrasaun públika,” Ministru Prezidénsia Konsellu Ministru, Fidelis Leite Magalhães hateten hafoin reuniaun ezekutivu, iha Palásiu Governu.

Notísia relevante : Sekretaria Estadu Komunidade Timor-oan iha rai-li’ur tenke rejista sidadaun iha baze dadus

Portavós Governu dehan maski kuadru normativu fundamentál ne’ebé presiza bele fó protesaun ba timor-oan sira iha rai-li’ur aprova ona, maibé presiza halo aprovasaun tan ba norma jurídika sira ne’ebé sei operasionaliza aplikasaun konkreta medida protesaun.

Diploma ne’e konstitui ho medida protesaun timor-oan iha rai-li’ur hodi fó tulun karik iha kazu katástrofe naturál ka ho perturbasaun grave ba orden públika, hodi lori fila timor-oan sira iha rai-li’ur, apoiu emerjénsia ba alojamentu, apoiu hahán emerjénsia no apoiu karik iha kazu tama prizaun ka detensaun.

Jornalista     : Antónia Gusmão

Editora          : Julia Chatarina

Publisidade

Leave a Reply

Latest Post

error: Content is protected !!