PST hakarak dezenvolve indústria nasionál hodi loke postu traballu ba timoroan sira
DILI, 26 abríl 2023 (TATOLI) – Partido Socialista de Timor (PST) ho númeru sorteiu 15 prontu dezenvolve indústria nasionál hodi loke postu traballu ba timoroan sira, nune’e bele redús joven sira bá buka serbisu iha rai-li’ur.
Sekretáriu-Jerál PST, Avelino Coelho, hatete tinan 20 liu ona partidu sira ne’ebé kaer ukun iha hanoin ne’ebé hakarak rezolve problema dezempregu ba timoroan sira maka ho esperansa haruka joven sira bá serbisu iha rai-li’ur hanesan Koreia Súl, Austrália, Portugál no Inglaterra.
“PST haree ida ne’e la’ós solusaun, PST konkorda se timoroan ida mak hakarak aventura bá rai-li’ur ho ninia hakarak rasik atu buka esperiénsia ne’e laiha buat ida. Maibé se joven Timoroan sira sai hosi Timor-Leste tanba laiha serbisu, ida ne’e maka PST la konkorda”, Avelino Coelho hatete iha diálogu ne’ebé maka hala’o iha sede nasionál PST, Balide, kuarta ne’e.
Nia dehan iha Eleisaun Parlamentár ne’e maka povu fó fiar ba PST atu kaer ukun, ninia programa maka sei dezenvolve indústria nasionál atu timoroan hotu bele serbisu iha nia rain rasik no sai patraun iha indústria nasionál atu nune’e labele sai fali atan iha ema seluk ninia indústria.
Avelino dehan PST ninia mehi boot ida maka atu dezenvolve setór agrikultura iha Timor-Leste tanba área ne’e maka sei fó serbisu boot ba timoroan sira. “Governu sira antes ne’e bele tau osan boot ba Fundu Veteranu sira, tanba saida maka labele tau billaun ida ba Fundu Agrikultura, maibé kuandu PST hetan fiar duni sei halo ida ne’e”, nia promete.
“PST sei fó subsídiu ba agrikultór atu nia oan sira bele fila ba knua hodi organiza malu dezenvolve agrikultura iha ida-idak nia fatin. Ho ida ne’e de’it maka sei minimiza timoroan sira atu sai bá li’ur”, nia dehan.
Tuir Avelino Coelho, ekonomia iha rai ida ne’e tenke hatudu liuhosi realidade dezenvolvimentu setór agrikultura, pekuária, peska nomós indústria, maibé fundu ba rai sira ne’ebé mak atu dezenvole área poténsia sira ne’e tenke povu nian. “Ne’e duni, PST hetan fiar karik, polítika ida maka sei haruka povu fila bá ida-idak ninia knua atu dezenvolve setór agríkola tanba Estadu sei tau fundu ba setór ne’e”.
Nia hatutan investimentu Estadu nia atu transforma agrikultura subsisténsia ba agrikultura moderna mai hosi indústria atu nune’e bele garante ekonomia ida sustentavel hodi loke serbisu barak iha rai ida ne’e, liuliu ba joven sira no ida ne’e mak PST ninia mehi ba rai ida ne’e.
Sekretáriu-jerál ne’e nunka konkorda ho konkluzaun simples katak Timor-Leste laiha ona postu traballu. “Sé ida ne’e maka akontese duni iha Timór, bele iha de’it loja ki’ik sira maka hamriik, maibé realidade ohin loron fatin-fatin iha Dili no iha territóriu tomak kuaze loja boot sira hamriik iha fatin-fatin”, nia realsa.
Nia salienta katak konkluzaun lójika ho objetivu iha rai ida ne’e iha rikusoin, tanba ne’e maka dada ema barak hakarak mai investe. “PST iha esperansa boot katak dezenvolvimentu kuandu la’o ona iha setór agrikultura, timoroan sira sei hetan moris di’ak no sei sai mós turista iha nasaun seluk”, afirma.
Notísia relevante: PST prontu hadia ekonomia agrikultor kafe iha Leorema
Jornalista: Tomé Amado
Editora: Maria Auxiliadora
