STAE Bobonaro ho autoridade sivíl-militár diskute preparasaun ba eleisaun
MALIANA, 26 abríl 2023 (TATOLI)-Sekretariadu Tékniku Administrasaun Eleitorál serbisu hamutuk ho Komisaun Nasionál Eleisaun (CNE, sigla portugés), kuarta ne’e realiza enkontru koordenasaun ho autoridade sivíl no militár hodi diskute kona-bá preparasaun atu hasoru eleisaun parlamentár, 21 maiu 2023.
Diretór STAE munisípiu Bobonaro, Mariano Viegas Amarál, informa, enkontru ne’e emvolve diretór liña ministeriál sira no diretór delegasaun territoriál, autoridade postu, autoridade seguransa no defeza, atu apoia órgaun eleitorál hodi fó susesu ba eleisaun lejizlativa ne’e.
Notísia relevante: STAE Bobonaro hahú halo espozisaun lista eleitór iha suku 50
“Ami ko’alia kona-bá apoiu tékniku no apoiu tranporte atu halo distribuisaun ba materiál sensitivu ho naun-sensitivu no mos rekolla materiál sensitivu iha sentru votasaun,” nia informa ba jornalista sira, iha Maliana, kuarta ne’e.
Enkontru ne’e mós Eletrisidade Timor-Leste, Empreza Públika (EDTL,E.P) no diresaun Obra Públika Munisipál Bobonaro, atu haree kona-bá asuntu reabilitasaun ba estrada no instala liña elétrika ba sentru votasaun no estasaun votu sira.
“Ita enkontru atu halo avaliasaun atu haree ita-nia fallansu ne’e iha-ne’ebé, nune’e diretór sira fó ideia, nune’e ita bele halo planu hamutuk iha atividade ne’e,” nia katak.
Reprezentante Prezidente Autoridade Munisípiu Bobonaro, Júlio Carvalho Caero, agradese tanba liuhosi enkontru ne’e hatudu entidade estadu sira bele halo kooperasaun di’ak órgaun administrasaun eleitorál sira.
“Ha’u husu ba administradór postu sira, depois enkontru ida-ne’e bolu xefe suku sira, ita halo avaliasaun ba iha kotuk, tanba esperiénsia tinna hirak liubá bainhira ita lori urna ba iha sentru votasaun, xefe suku ida laiha. Ida-ne’e mak tenke tau atensaun,” nia apela.
Nia sublina parte lojístika autoridade munisípiu Bobonaro no sei apoia karreta estadu hamutuk unidade 16 ba órgaun eleitorál atubele transporta no rekolla materiál sensitivu sira iha sentru votasaun no estasaun votu ne’ebé kolokadu.
Komandante PNTL Munisípiu Bobonaro, Superintendente Xefe, Antoninho Mauluta, hateten PNTL prontu apoia seguransa inklui transporte, maibé presiza apoia hosi parte hotu-hotu tanba Polísia mesak de’it labele garante buat hotu la’o ho di’ak.
“Ita hotu-hotu hamutuk, sente katak munisípiu ne’e ita-nia rasik, atu di’ak ka aat só ita mak tenke halo, ha’u fiar katak ita sei determina tán vitória dala-ida, katak iha Bobonaro eleisaun buat hotu-hotu sei la’o di’ak, ema seluk bele, ita Bobonaro mós bele,” Mauluta afirma.
Jornalista: Sergio da Cruz
Editór: Evaristo Soares Martins
