AINARO, 26 abríl 2023 (TATOLI) – Xefe Suku Soro, postu administrativu Ainaro, munisípiu Ainaro, Miguel Perreira de Araújo, preokupa ho kondisaun estrada ne’ebé grave hodi difikulta movimentasaun transporte públiku iha suku refere.
“Ami triste tebes, tanba estrada ho kondisaun ne’ebé aat difikulta há’u nia povu atu lori sira nia produtu husi aldeia ba faan iha merkadu”, Miguel de Araújo informa ba Ajénsia Tatoli, kuarta ne’e.
Líder komunitáriu ne’e esplika sira esforsu ona hodi aprezenta proposta ba Servisu Administrasaun Munisipál Ainaro hodi rezolve kestaun ne’e.
“Dalabarak ami halo proposta no propoin ba servisu munisipál no nasionál atu hadia estrada iha suku Soro liga ba suku Soru Karik, maibé to’o agora ami seidauk simu resposta ruma”, nia lamenta.
Miguel de Araújo haktuir, iha 2016, Governu liuhusi Programa Nasionál Dezenvolvimentu Suku (PNDS) autoriza ona mákina pezadu atu ateru estrada iha suku refere, maibé to’o agora sedauk realiza.
Aleinde ne’e, autoridade lokál hato’o mos proposta ba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE,I.P), atu hadia estrada husi Soro liga ba Soru Kraik, maibe kontinua laiha resposta.
“Iha futuru Governu atu halo ka la’e, ida ne’e mak sai hanesan pergunta ida mai ami lideransa suku, tanba to’o agora ami seidauk simu resposta ruma husi ukun na’in sira. Tanba ne’e ami hein katak iha Governu foun mai bele tau prioridade atu hadia ami nia estrada”, nia sujere.
Miguel Perreira de Araújo preokupa mós falta sentru saúde no rezidénsia ba médiku sira, dalaruma inan-isin rua sira ne’ebé atu partus no komunidade sira atu halo tratamentu saúde emerjénsia, maibé fatin laiha, tanba ne’e husu ba ministériu relevante atu harii sentru saúde no rezidénsia ba pesoál médiku hodi halo tratamentu ba populasaun.
“Iha médiku kontratadu na’in tolu, maibé fatin ba sira atu hela ne’e mak seidauk iha, tanba ne’e Ami sujere de’it ba ministériu relevante, iha furutu Governu bele tau konsiderasaun ba kestaun ida ne’e”, nia sujere.
Tuir Xefe Suku, pesoál médiku hirak ne’e utiliza provizóriu sala administrasaun suku hodi halo atendimentu ba pasiente sira. Nia informa komunidade iha suku refere prontu oferese rai hodi harii sentru saúde, bainhira Governu hakarak halo konstrusaun.
Suku Soro iha aldeia haat, mak hanesan Gerudu, Terlora, Poelau no Geolala ho nia populasaun 2.078.
Notísia relevante: Estrada ligasaun Same-Vila ba Fatuberlihu kondisaun grave
Jornalista: Afonso do Rosário
Editora: Isaura Lemos de Deus
