Edukasaun Covalima halo ona pagamentu finál ba projetu komunitária 15
COVALIMA, 27 abríl 2023 (TATOLI)–Diretór Edukasaun Munisípiu Covalima, Rui Amarál Suri Seran, hateten progresu konstrusaun projetu komunitária 15 iha Covalima halo ona pagamentu finál hein prosesu atu halo inaugurasaun.
Notísia Relevante: Progresu konstrusaun projetu komunitária iha Covalima atinje ona 75%
“Implementasaun projetu komunitária hamutuk 16 hoisi númeru ne’e projetu komunitária 15 horisehik asina ona atu halo pagamentu final, ho nune’e ohin sira halo ona pagamentu finál. Maibé, iha suku Usecai implementasaun projetu komunitária foin atinji 75%,” Rui Amarál Suri Seran hateten ba Agência Tatoli, kinta ne’e.
Maske pedidu halo ona pagamentu finál maibé Ajénsia Dezenvolvimentu Nasionál Institutu Públiku (ADN, I.P.) sei haree baihira buat balun seidauk loos presiza atu hadi’a nune’e eskola balun pagamentu sei falta osan $1000, ne’e depende rekomendasaun hosi ADN.
Ho nune’e, Edukasaun Covalima halo ona preparasaun masímu atu halo inaugurasaun depende agenda hosi Ministériu Edukasaun Juventude no Desportu (MEJD).
Tuir dadus hosi edukasaun Covalima konstrui no rehabilita eskola 15 mak hanesan EBF Holbolu, Laen-Tolu, Maucola, Salasa, Usecai, Soidiga, Aitos, Macocon, Has-Ain, eskola tékniku Vokasionál Akar-Laran, Eskola Sekundáriu Jerál Públiku Suai, EBC Zumalai, Fatumea, Traducama konstrui no reabilita eskola sala-de- aula kompleta ho eskritóriu, armajen no toilet.
Antes ne’e, iha loron 7 fulan-outubru tinan 2022, Vise Ministru Edukasaun Juventude no Desportu, António Guterres, asina kontratu ho grupu komunitária ne’ebé atu kontrui no reabilita eskola 15 iha munisípiu Covalima.
Orsamentu reabilitasaun no konstrusaun ba eskola 15 iha Covalima ne’e, mai hosi orsamentu jerál estadu tinan 2021 ne’ebé prevee iha transferénsia públika hamutuk millaun $1.6, grande projetu orsamentu mai hosi rubrika kapital dezenvolvimentu ne’ebé konstrui eskola Kafé haat (4).
Jornalista : Celestina Teles
Editór : Cancio Ximenes
