DILI, 27 abríl 2023 (TATOLI)–Governu liuhosi reuniaun Konsellu Ministru (KM) estraordináriu, kinta ne’e, aprova projetu dekretu Governu, ne’ebé aprezenta hosi Ministru Turizmu, Komérsiu no Indústria, José Lucas do Carmo da Silva, kona-ba kriasaun Sekretariadu Nasionál Adezaun ba Organizasaun Mundiál Komérsiu (OMK).
“Objetivu hosi Sekretariadu Nasionál ba Adezaun Organizasaun Mundiál Komérsiu maka atu garante efisiénsia no efikásia ekipa téknika no sustentabilidade serbisu to’o adezaun efetiva país ba organizasaun, armonizasaun no adekuasaun sistema nasionál administrasaun no jestaun ekonomia ba norma regulamentár no padraun organizasaun nian,” Ministru Prezidénsia Konsellu Ministru, Fidelis Leite Magalhães, relata hafoin reuniaun ezekutivu, iha Palásiu Governu.
Notísia relevante : Adezaun Timor-Leste ba OMK bele gradua iha tinan ne’e
Portavós Governu dehan, estrutura proposta sei depende ba membru Governu responsável ba área komérsiu no indústria sei dirije hosi Koordenadór Jerál ida no sei inklui profisionál espesializadu iha área prinsipál iha ámbitu adezaun ba OMK.
“Liuliu iha asuntu komérsiu internasionál sasán no servisu, propriedade intelektuál sei kompoin mós hosi profisionál sira iha área apoiu tékniku administrativu no finanseiru inklui ba monitorizasaun no avaliasaun”, nia konklui.
Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.
Hanesan país observadór, Governu estabelese grupu traballu ba OMK hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.
Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.
OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.
Jornalista : Antónia Gusmão
Editora : Julia Chatarina
