DILI, 27 abríl 2023 (TATOLI)—Governu lliuhosi reuniaun Konsellu Ministru (KM) estraordinária, kinta ne’e, delibera ona projetu ne’ebé aprezenta hosi Ministru Transporte no Komunikasaun, José Agustinho da Silva hodi aprova prosedimentu aprovizionamentu infraestrutura Aeroportu Internasionál Prezidente Nicolau Lobato, Comoro.
Prosedimentu aprovizionamentu ne’e maka OCB/001/MTC-2022 no RFP/066/MTC-2022, relasiona ho konsesaun no konstrusaun pista, taxiway, torre kontrolu no área estasiona aeronave iha Aeroportu Comoro.
“Konsellu Ministru aprova ona proposta kona-ba manan-na’in ne’ebé sei halo konstrusaun ba Aeroportu Nicolau Lobato no empreza ne’ebé sei halo jestaun ba projetu ne’e,” Ministru Prezidénsia Konsellu Ministru, Fidelis Leite Magalhães relata hafoin reuniaun ezekutivu, iha Palásiu Governu, kinta ne’e.
Notísia relevante : Lansamentu fatuk ba konstrusaun Aeroportu Comoro seidauk bele realiza iha marsu
Nune’e, KM sei haruka ba iha Kámara Konta, enkuantu prosesu hotu Governu kumpre ona.
“Governu planeia ona atu halo lansamentu dahuluk ba konstrusaun iha semana daruak maiu 2023. Governu sei konsentra loron ne’ebé planeia ona iha loron 14 maiu,” nia akresenta.
Portavós Governu ne’e espera katak iha fulan-maiu ne’e bele realiza ona lansamentu dahuluk tanba diskusaun projetu ne’e desde governasaun anteriór no finalmente VIII Governu konsege rezolve.
Empreza rua ne’ebé sai manan-na’in sei publika hosi Komisaun Nasionál Aprovizionamentu, Institutu Públiku (CNA, I.P) tanba molok deside manan-na’in sira, liu ona prosesu naruk liga ho selesaun bazeia ba kapasidade téknika no finanseira ne’ebé entidade relevante halo ona.
“Konsellu Ministru laiha objesaun ba aprovizionamentu ne’ebé sira halo no dalan hotu ne’ebé sira halo ho forma transparante ho loloos,” Ministru dehan.
Jornalista : Antónia Gusmão
Editora : Julia Chatarina
