DILI, 27 abríl 2023 (TATOLI)—Governu liuhosi reuniaun Konsellu Ministru (KM) estraordinária, kinta ne’e, delibera ona projetu ne’ebé aprezenta hosi Ministru Petróleu no Minerál, Víctor da Conceição Soares, hodi autoriza despeza ho montante millaun $54.
Orsamentu ne’e ba transferénsia fundu hosi Orsamentu Jerál Estadu (OJE) ba programa ‘401 jestaun rekursu petrolíferu no minerál’ hosi Ministériu Petróleu no Minerál (MPM) ba Timor GAP, Empreza Públika (Timor GAP, E.P).
“Inisiativa ne’e ninia objetivu mak atu permite katak Timor GAP E.P iha rekursu ne’ebé presiza hodi garante kumprimentu objetivu relasiona ho atividade jestaun ba patrimóniu petróleu nian,” Ministru Prezidénsia Konsellu Ministru, Fidelis Leite Magalhães, relata hafoin reuniaun ezekutivu, iha Palásiu Governu, kinta ne’e.
Governu autoriza OJE aprovadu transfere ba empreza públika hodi halo operasaun no investimentu ida.
Timor GAP, E.P nu‘udar empreza estatál mina no gás ne’ebé halo servisu ein nome Estadu, ho atividade esplorasaun no produsaun iha rai maran to’o tasi laran inklui iha nasionál to’o internasionál.
Notísia relevante : Estatutu Timor Gap hetan alterasaun iha Konsellu Ministru
Antes ne’e, iha OJE 2022 Governu prevee millaun $62 ba Timor GAP, E.P.
Empreza estatál ne’e identifika, dezenvolve no otimiza ho valór estratéjiku no komersiál hosi Timor-Leste nia rekursu naturál sira ba benefísiu no avansu timor-oan. Setór enerjia bele kontribui maka’as ba Timor-Leste nia ekonomia no dezenvolvimentu tanba país ne’e iha responsabilidade atu kontinua dudu futuru inklui atensaun maka‘as ba dezafiu ekonómiku, sosiál no ambientál ne’ebé sei mai.
Timor GAP, E.P iha kompromisu atu hala’o avansu iha país ne’e, nune’e sei hala‘o operasaun ho kualidade a’as, transparénsia no sustentabilidade di’ak liu hodi fornese enerjia di’ak ba timor-oan sira.
Timor GAP, E.P harii ona empreza subsidiária oin-oin, ne‘ebé abranje operasaun empreza ne’e iha upstream, downstream no projetu espesífiku sira, atu hala‘o atividade espesífika sira ho forma efisiente no efikás liu. Subsidiariu sira ne‘e fó dalan ba Timot GAP atu estabelese parseria ho empreza nasionál ka estranjeiru sira seluk, nune’e mós atu sosa, halibur, no atu disponível asaun iha empreza sira seluk hodi fornese flesibilidade no divulgasaun adisionál tuir nesesidade.
Jornalista : Antónia Gusmão
Editora : Julia Chatarina
