MS inaugura edifísiu postu saúde iha suku Builale Ossu
VIQUEQUE, 27 abríl 2023 (TATOLI)–Governu liuhosi Ministériu Saúde (MS), kinta ne’e, ofisialmente inaugura edifísiu postu saúde iha suku Builale, postu administrativu Ossu, munisípiu Viqueque.
Iha biban ne’e, Ministra Saúde, Odete Maria Freitas Belo, hateten, inisiativa ne’e atu abitante sira bele asesu fasilidade saúde no sei kompleta ho ekipamentu saúde inklui rekursu umanu hodi serbisu iha postu ida-ne’e.
“Ha’u agradese ba empreza Borala Unip LDA ne’ebé konsege konstrui postu saúde ho kualidade no enjiñeiru MS ne’ebé durante ne’e akompaña implementasaun konstrusaun postu saúde ida-ne’e. Ha’u hakarak husu ba autoridade no abintante sira, liu-liu inan isin-rua tenke tur ahi (partu) iha postu saúde ne’ebé ita konstrui ona,” Governante ne’e dehan liuhosi diskursu iha serimónia inagurasaun postu saúde iha suku Builale, kinta ne’e.
Notísia relevante : Administradór preokupa ho postu saúde Soibada laiha doutór
Ministra husu abitante Builale labarik sira tenke kompleta vasina no ba inan isin rua, durante bebé iha kanotak tenke konsulta ho parteira sira pelu menus dala-haat.
“Ami saúde ninia kanaar maka atu tau-matan ba abitante sira hodi hadook hosi moras kontajioza hanesan moras tuberkuloze. Iha postu saúde ita esforsu hodi halakon moras kontajioza sira iha área Builale no moras naun kontajioza hanesan tensaun no moras fuan. Tanba ne’e, ha’u husu ba abitante sira tenke mai konsulta iha postu saúde,” nia akresenta.
Kustu ba obra ne’e hosi Orsamentu Jeral Estadu (OJE) 2021 ho montante $327.232,66, ne’ebé responsável ba konstrusaun maka empreza Borala, Lda no hahú konstrusaun iha loron 25 fevereiru 2022.
Postu saúde ne’e kompostu hosi sala emerjénsia, sala partu, sala observasaun, sala konsulta maternidade, sala mini laboratórium, sala konsulta jerál, sala farmasia no seluk tán.
Daudaun ne’e pesoál saúde ne’ebé destaka iha postu saúde Builale hamutuk haat.
Iha fatin hanesan, Administradór munisípiu Viqueque, Januario Soares ‘Bolly’, agradese ba VIII Governu liuhosi MS ne’ebé bele harii ona postu saúde ida iha suku Builale hodi abintante sira bele asesu.
“Postu saúde importante ba ita hodi hetan asisténsia hosi pesoál saúde sira hodi halo tratamentu ba moras sira ne’ebé hetan. Ha’u hanoin postu saúde ida-ne’e boot liu postu saúde sira iha munisípiu Viqueque tomak, nune’e ha’u hakarak futuru konstrusaun postu saúde iha suku sira karik tenke modelu hanesan iha suku Builale,” nia dehan.
Nune’e mós, Xefe suku Builale, Anónio Gomes Moniz, orgullu tanba suku Builale bele hetan fasilidade saúde kualidade hodi fasilita abitante sira.
“Ami hakarak dezenvolvimentu tama iha ami-nia suku ne’e bele dura ba tinan 30. Ha’u mós sujere aumenta pesoál saúde no seguransa hodi kontrola postu saúde,” nia tenik.
Tuir dadus sensu populasaun tinan 2015, totál populasaun suku Builale hamutuk 1.137, kompostu hosi mane 574 no feto 563, ho totál uma-kain 222.
Padre Administradór Parokia Ossu, José Gonzaga fó bensaun ba postu saúde, ne’ebé akompaña hosi Ministra Saúde, Administradór munisípiu Viqueque, Administradór postu Ossu, postu Viqueque Villa, pesoál saúde inklui abitante sira hosi suku Builale.
Jornalista : Vitorino Lopes da Costa
Editora : Julia Chatarina
