DILI, 27 abríl 2023 (TATOLI) – Partidu Os Verdes de Timor (PVT) kompromete sei harii indústria peska iha munisípiu Liquiçá bainhira manán iha Eleisaun Parlamentar (ElPar) 2023.
Adjuntu Sekretáriu Nasionál PVT ba asuntu Agrikultura no Peska, Sabino Mendes de Jesus, hatete Timor-Leste iha rikusoin tasi ne’ebé luan kuaze rihun 72 km2, maibé to’o agora seidauk desenvolve ho di’ak, liuliu iha Liquiçá.
“Kada tinan Timor-Leste lakon millaun $230 tanba peska ilegál. Saida mak Os Verdes hakarak dezeña mak harii indústria peska iha rai Liquiçá”, Sabino Mendes reitera iha nia intervensaun iha ámbitu kampaña iha kampu futeból Liquiçá, kinta ne’e.
Nia rekoñese katak munisípiu refere koñesidu ho nia produtu lokál, hanesan aifuan oinoin, maibe durante ne’e la hetan espasu hodi fa’na, nune’e presiza atu estabelese fatin di’ak ba negosiante sira.
Sabino Mendes salienta katak bainhira Os Verdes asume pozisaun mak sei halo planu, rona opiniaun husi parte hotu iha setór agrikultura, peska no floresta no bolu emprezáriu sira hodi halo investimentu iha área oin-oin.
“Ita tenke rona opiniaun husi parte hotu hodi bele desenvolve setór agríkola no peska, tanba ida ne’e mak renovavel katak iha kontinuasaun lahanesan ho petróleu ne’ebé loron ida sei maran. Ita-nia ikan sei hatama iha indústria hodi transforma ba sardiña, labele bá ka’er ikan no fa’an de’it iha dalan ninin”, nia afirma.
Iha fatin hanesan Prezidente PVT munisípiu Liquiçá, Ridwan dos Santos, realsa bainhira Os Verdes hetan oportunidade ba kaer Governu maka sei uza Orsamentu Jerál Estadu ba povu nia presiza hodi dezenvolve setór produtivu no hasa’e saláriu minimu.
“Problema mak saláriu. Serbisu barak maibé osan ne’ebé fó lasufisiente atu garante ita-nia moris. Loke postu traballu maibé saláriu minimu larezolve, Timór nafatin ki’ak”, nia hateten.
Tuir observasaan jornalista Tatoli iha terrenu, kampaña husi PVT hetan seguransa másima husi Polísia Nasionál Timor-Leste (PNTL) no hetan observasaun husi CNE, RENETIL no seluk tan.
Notísia relevante: Os Verdes prioritiza harii sentru formasaun ba joven dezempregu
Jornalista: Cidalia Fátima
Editora: Maria Auxiliadora
