Prezidénsia Repúblika husu Governu proteje traballadór nia direitu iha “May Day”
DILI, 27 abríl 2023 (TATOLI)—Xefe Kasa Sívil Prezidénsia Repúblika, Bendito Freitas, husu Governu no entidade sira seluk atu proteje traballadór sira-nia direitu iha ámbitu komemorasaun “May Day” ka loron mundiál ba traballadór ne’ebé mundu tomak sei selebra iha kada 01 maiu ne’e.
Notísia Relevante: Reflesaun ba Komemorasaun Loron Mundiál Traballadór Sira
“Loron 01 maiu, loron ida ba traballadór sira-nia loron. Ha’u hanoin importante tebes ita-nia rekonesimentu ba ita-nia traballadór sira-nia valor. Tempu ida mós, ita halo reflesaun kona-ba tratamentu ne’ebé hanesan ba ita-nia traballadór sira hasoru liu-liu sira-nia direitu. Dala ruma sira iha obrigasaun maibé sira-nia direitu menus atu rekuñese, tanba ne’e husu ba Governu no entidade hotu atu proteje traballadór sira-nia direitu,” Xefe Kaza Sivíl Prezidénsia Repúblika ne’e hateten ba jornalista sira iha UNITAL, Becora, kinta ne’e.
Tanba ne’e, nia husu instituisaun Estadu ne’ebé responsável ba área traballu no empregu presiza halo koordenasaun didi’ak ho asosiasaun empregradór sira ka kompañia sira-ne’ebé fó serbisu ba traballadór sira atu bele iha ajustamentu ba regra tuir kódigu lei traballu nian, atu nune’e traballadór sira-nia direitu bele respeitadu.
“Ezemplu, buat ne’ebé ita foka mak saláriu mínimu. Kestaun seluk, kona-ba protesaun iha serbisu, traballu infantil labele halo ki’ik-oan sira serbisu tanba ita Timor mós subskreve tiha ona ba konvensaun sira ba organizasaun internasionál traballu nian,” nia hateten.
Prezidénsia Repúblika hato’o nia liafuan ba ezekutivu sira atu bele ezekuta tanba ida-ne’e tenke fiar Estadu hodi tau matan hela iha volume kapasidade ne’ebé eziste, no agora presiza hadi’a di’ak liután tanbá ita tama ona ba mundu indústria laborál ida kompetetivu.
Iha mundu kompetividade ne’e, nia dehan, presiza hadi’a duni rekursu umanu ho koñesimentu tékniku atu sira bele compete, tanbá ne’e Estadu presiza tau metan ba formasaun profisionál sira.
Jornalista : Nelson de Sousa
Editór : Cancio Ximenes
