VIQUEQUE, 28 abríl 2023 (TATOLI)–Prezidente Partidu Demokrátiku (PD), Mariano Asanami Sabino, kompremete ba militante ho simpatizante sira iha postu Uatucarbau, munisípiu Viqueque, bainhira ukun sei fó espasu ba joven sira sai inovadór no kreativu.
“Ita hakarak kontinua fó bolsa estudu no kréditu ba joven sira, ida-ne’e maka PD prepara. Joven tenke tama iha Estadu hodi sai kompetetivu, inovadór no transformafór hodi kompete ho nasaun sira seluk. Tanba ne’e, bainhira ita ba ukun no halo dezenvolvomentu sei fó espasu barak liu ba joven sira halo kreatividade hodi iha mudansa ba an. PD la mai ho promesa maibé mai ho ninia kompromisu ne’ebé hakerek ona,” Mariano Asanami hateten durante kampaña iha kampu futeból iha suku Afalokai, postu Uatucarbau, sesta ne’e.
Notísia relevante : PD ukun sei hatuur loloos RAEOA no ZEESM
Nia dehan, PD iha hanoin atu halo planu estratéjiku ne’ebé konsistente, tanba ne’e PD konsidera Eleisaun Parlamentár sai kursiál atu kontinua sai soldadu prontu hodi serbisu hamutuk ho líder rezisténsia sira seluk.
“Ami hakarak hatúr Estadu ne’ebé ho kualidade hodi kompete ba nasaun seluk. Buat barak maka ita tenke hadi’a no aselera. Tanba ne’e hili PD ho kakutak revolusionáriu hodi aselera dezenvolventu. Ohin ha’u mai ho inan aman hosi suku Afaloikai hodi fó konfiansa hadi’a kultura no polítika ódiu malu. Bainhira ba ukun sei kolabora ho partidu no ema hotu,” nia tenik.
Mariano fiar katak Timor-Leste sei sai modernu, sivilizadu no iha futuru ne’ebé nabilan no povu moris di’ak.
Kampaña diálogu ne’e hahú hosi tuku 13:00 to’o 18:00, ne’ebé hetan partisipasaun hosi militante no simpatizante Partidu PD hosi postu Uatucarbau.
Aleinde ne’e, atividade ne’e hetan seguransa hosi Polísia Nasionál Timor-Leste (PNTL) munisípiu Viqueque no akompaña hosi Komisaun Nasionál Eleisaun (CNE, sigla portugés) inklui observadór nasionál no internasionál.
Jornalista : Vitorino Lopes da Costa
Editora : Julia Chatarina
