PLPA kompromete sei halakon lei pensaun vitalísia
COVALIMA, 28 abríl 2023 (TATOLI)–Adjuntu Sekretáriu Jerál Partidu Liverta Povu Aileba (PLPA), João Adito Perreira, hateten tiur kompromisu polítika PLPA nian haktuir bainhira povu fó fiar iha eleisaun parlamentár mak PLP sei halakon pensaun vitalísia no hadi’a infraestrutura bázika.
Notísia Relevante: PLPA prioritiza loke indústria Tabaku iha Balibo
“Bainhira povu fó fiar ba ami manán iha eleisaun parlamentár, ami sei halakon lei pensaun vitalisia ne’ebé durante ne’e povu la sente maske eis titular sira servisu durante tinan lima de’it, maibe sira-nia estatutu sai espesiál iha nasaun ne’e. Tuir loloos, laiha ema ida mak espesial iha nasaun ne’e ho tratamentu hanesan, no PLP sei hadia infraestrutura bázika,” João Adito Perreira hato’o promesa ne’e bainhira hala’o kampaña iha aldeia Kulu-Oan, suku Tashilin, postu administrativu Zumalai, munisípiu Covalima, sesta ne’e.
Tanba, nia dehan, PLPA mak dalan ba moris di’ak no dalan alternativa no fó moris dignu ba povu iha Timor-Leste.
Aleinde halakon lei pensaun vitalisia, PLPA mós sei apoiu intensiva ba grupu arte marsiál, arte rituál sira, nune’e Governu tenke kria kampu traballu ba joven sira liuhosi meiu sira hanesan estabelese kooperativa atu sira bele dezenvolve sira nia-aan iha aspetu ekonómia.
Partidu PLPA ho númeru sorteiu rua (2) ne’e mos kompromete sei fó moris di’ak ba grupu arte marsiál no arte rituál liuhosi atividade ekonómia.
Programa jerál PLPA ba iha aldeia Kulu-Oan, suku Tashilin, postu administrativu Zumalai, fó prioridade ba programa sira hanesan agrikultura tanba Covalima potensia ba agrikultura hodi hasa’e produsaun iha rai-laran, infraestrutura bázika no setór seluk tan.
Koordenadór PLPA Munisípiu Covalima, Sabino Moniz Sequeira, reforsa katak nia parte sei esforsu atu lori vitória ba PLPA iha munisípiu Covalima, nune’e bele konkretiza promesa sira-ne’ebé mak durante ne’e partidu hato’o iha kampaña eleitorál.
“Se povu fó konfiansa ba ami iha eleisaun parlamentár, ha’u sei ezije ba estrutura nasionál atu hadi’a infraestrutura bázika hanesan hadia estrada hosi estrada protokolu liga ba aldeia Kulu-Oan,” nia dehan.
Atividade kampaña eleitorál PLPA ho tipu komísiu aberta ne’e hetan observasaun hosi Komisaun Nasionál Eleisaun (CNE-sigla portugés) no Provedoria Direiru Umanu no Justisa (PDHJ) no hetan seguransa hosi PNTL.
Jornalista : Celestina Teles
Editór : Cancio Ximenes
