DILI, 28 abríl 2023 (TATOLI) – Profesór na’in-28 hosi Ensinu Pré-Eskolár iha Munisípiu Ainaro partisipa, entre 27 abríl e 03 maiu, formasaun pedagójika hodi hasa’e koñesimentu atubele hanorin labarik sira iha nivel refere.
Diretór Servisu Edukasaun Munisípiu Ainaro, Óscar de Araújo, dehan formasaun pedagójika ne’e atu kapasita profesór sira oinsá bele hanorin labarik sira iha Pré-Eskolár atubele hatoman aan partisipa iha atividade sira ne’ebé maka hala’o iha aula.
“Tanba profesór sira maka tenke hetan formasaun ida adekuada atubele lori labarik sira ba prosesu aprendizajen. Profesór sira tenke iha duni koñesimentu ida adekuadu no iha komunikasaun ida di’ak ho labarik sira. Tenke hatene anima labarik ho atividade kanta, dansa, konta istória halo kómiku, nune’e bele atrai sira hodi bele hatoman aan iha atividade aprendizajen”, Diretór Edukasaun Ainaro hatete ba Tatoli, iha Vila Verde, sesta ne’e.
Formasaun pedagójika ne’e partisipa husi profesór Ensinu Pré-Eskolár tantu pemanente, kontratadu komu voluntáriu, tanba atu hetan rekursu ida bein preparadu tenke loke oportunidade hanesan ba sira hotu.
Formasaun pedagójika ne’e realiza durante loron lima ne’ebé iha faze dahuluk fó prioridade ba manorin 43, maibé na’in-28 de’it maka partisipa.
“Profesór na’in-15 latuir tanba lahetan informasaun ho mudansa kalendáriu kurrikulár depois ezame primeiru trimestre remata, entaun eskola hotu feriadu no foin maka anunsia fali formasaun ba profesór sira”, nia esplika
Reponsavel edukasaun munisipál ne’e nafatin tau prioridade formasaun ba dosente sira hotu atubele hetan kapasitasaun hodi apoiu labarik sira molok hakat bá primeiru anu.
Jornalista: Tomé Amado
Editora: Maria Auxiliadora
