AINARO, 28 abril 2023 (TATOLI) – Diresaun Servisu Edukasaun Munisípiu Ainaro submete ona lista profesór reklamante hamutuk na’in-395 ne’ebé selesionadu ba rekursu umanu nasionál atu kontinua halo verifikasaun hodi hetan konsiderasaun nu’udar profesór kontratadu.
Diretór Servisu Edukasaun Munisípiu Ainaru, Óscar de Araújo, relata katak iha primeira faze profesor 71 mak admitidu.
Tuir dirijente ne’e, hafoin Ministériu Edukasaun, Juventude no Desportu (MEJD) fó espasu ba profesór hotu iha Timor laran hatama reklamasaun, nune’e lista reclamante sira iha munisípiu Ainaro sa’e ba 395 husi eskola 144.
“Dadus sira ne’e ami rejistu hotu iha baze de dadus edukasaun munisípiu Ainaro no há’u rasik submete ba iha MEJD”, informa Óscar de Araújo ba Tatoli, iha Ainaro Vila.
Nia dehan, Ainaro ne’e kompleksu, tanba ekipa sira husi nasionál mai foti de’it dadus profesór sira balu de’it, enkuantu barak mak sira la foti.
Tuir Óscar de Araújo, iha postu administrativu Maubisse ekipa nasionál foti lista husi eskola ida ka rua de’it no iha Hato-builico rekolla lista profesór iha de’it Eskola Sekundária Nain Feto Ramelau (ESCANFER).
Entertantu, iha postu administrativu Ainaro, rekolla dadus profesór sira iha Eskola Bázika Filiál (EBF) Hatumeta-Udo, Eskola Sekundária-Jerál Fernando La Sama de Araújo no EBF Maununo, iha Hatu-Udo sira foti dadus iha de’it EBF Bobe no Eskola Nossa Senhora de Lurdes, maibé eskola sira hanesan ESTV no eskola katólika sira la foti dadus.
Dirijente ne’e kompromete, iha nia mandatu tinan ida ne’e bele rekruta ona professor liu 100 no iha reuniaun ho Ministro Edukasaun, Juventude no Desportu sei kontinua ejije nafatin profesór sira ne’e nia direitu, tanba sira hanorin tinan barak ona.
Notísia relevante: Servisu Edukasaun Ermera aprezenta ona lista profesór reklamante na’in-50
Jornalista: Afonso do Rosário
Editora: Isaura Lemos de Deus