DILI, 25 abríl 2023 (TATOLI) – Diresaun Servisu Edukasaun Munisípiu Ermera (DSEME) submete ona lista profesór reklamante na’in-50 ne’ebé selesionadu ba rekursu umanu nasionál atu kontinua halo verifikasaun hodi hetan konsiderasaun nu’udar profesór kontratadu.
Diretór Servisu Edukasaun Munisípiu Ermera, Eduardo Martins, relata katak lista profesór reklamante sira ne’e sei tama iha prosesu no bele hakat bá asina kontratu hamutuk ho lista admitidu sira dahuluk ne’ebé Ministériu Edukasaun, Juventude no Desportu (MEJD) fó sai ona hosi munisípiu refere.
“Antes ne’e, ita-nian prosesu verifikasaun ba lista profesór reklamante ne’ebé prienxe rekizitu iha de’it na’in-45. Bainhira ita submete ba Ministériu sira husu aumenta tan reklamante na’in-lima. Ita halo fali verifikasaun, ikus mai hetan tan na’in lima, nune’e ita-nia lista profesór reklamante sa’e ba 50,” dehan Eduardo Martins ba Tatoli, iha edifísiu MEJD Vila Verde, tersa ne’e.
Diretór ne’e afirma katak dadus primeiru profesór voluntáriu ne’ebé admitidu ba kontratadu hamutuk 125, depois mosu tan fali prosesu reklamasaun ba profesór sira ne’ebé lapasa aumenta tan ba 50, ho nune’e totál profesór kontratadu husi Ermera ne’ebé sei hetan kontratu iha tinan ida ne’e hamutuk 175.
Tuir nia, dadus profesór reklamante ne’ebé lapasa iha selesaun dokumentu ne’e hamutuk 870, maibé agora 50 mak avansa ona ba prosesu kontratu no hela de’it 820. Enkuantu, sira ne’ebé la pasa ne’e sei hela ba faze daruak iha prosesu rekrutamentu.
Tuir dadus nasionál ne’ebé MEJD rejista ona hamutuk 2.910, hosi númeru sira ne’e maka MEJD halo ona selesaun no sira ne’ebé konsege hetan ona konsiderasaun tama iha kritériu no sai profesór kontratadu hamutuk 1.539, enkuantu na’in-1.371 maka la tama iha selesaun dokumentu.
Notísia relevante: MEJD simu ona dadus profesór reklamante besik 1.000
Jornalista: Tomé Amado
Editora: Maria Auxiliadora
