DILI, 28 abríl 2023 (TATOLI)– Partidu União Nacional Democrática de Resistência Timorense (UNDERTIM), sesta ne’e, hala’o kampaña eleitorál iha Munisípiu Liquiça hodi promote bainhira ka’er sei hari’i Universidade Prezidente Nicolau Lobato iha Liquiça.
Perante diálogu ho militante no simpatizante, Sekretariu Jéral Partidu UNDERTIM, Adolfo da Silva “Uatumissa”, promete sei hari’i Universidade ho naran Prezidente Nicolau Lobato iha Munisípiu Liquiça bainhira eleitu iha Eleisaun Parlamentar 2023.
“Ita nia polítika sei loke universidade ida naran Prezidente Nicolau Lobato hodi konvida estudante iha munisípiu 13 hodi mai vizita Liquiça tanbá ita hakarak fó valór ba ita nia luta nain sira,” katak Sekjer Partidu UNDERTIM ne’e.
SekJen ne’e rekoñese iha tempu funu nia laran Liquiça mak inisia uluk luta ba independensia liuhusi Prezidente Nicolau Lobato, Samba 9 no veteranu sira seluk hodi bolu hamutuk munisípiu hotu luta ba ukun rasik aan.
Nune’e inisiativa loke universidade ne’e sei fó oportunidade mós ba veteranu oan sira hodi hasa’e sira nia kapasidade no abilidade.
“Nune’e, ha’u husu ita boot sira vota ba númeru 10 atu unifika forsa hodi dezenvolve rekursu umanu iha Timor-Leste”, katak.
Entretantu, Prezidente Partidu UNDERTIM, Francisco Guterres Mano Bui, mós kompromete lori fila urna husi Saudozu Prezidente Nicolau Lobato, bainhira hetan asentu iha Parlamentu Nasionál.
“Ita nia saudozu nia ruin hakoi iha Jakarta ne’ebá, se’e ita nia governu sériu tuir ita nia saudozu nia urna mai ona, maibé agora sira nonook deit. Ha’u rasik hamutuk ho matebian Vitorino dos Santos, ko’alia ona ho Prabowo katak bele lori fila urna ne’e,” Nia esplika.
Nune’e, Francisco Guterres Mano Bui husu ba povu Liquiça tomak atu fó fi’ar ba UNDERTIM liuhusi vota ba númeru 10. Nune’e esforsu lori urna husi Saudozu Prezidente Nicolau Lobato bele to’o mai Timor-Leste.
Tuir orÁriu husi Komisaun Nasionál ba Eleisaun (CNE -sigla portuges) partidu UNDERTIM sei kontinua halo kampaña eleitorál iha Munisípiu Liquiça ho atividade fahe brosura no diálogu ho komunidade.
Tuir observasaun Jornalista Agência TATOLI,I.P nian iha tereñu nota katak kampaña eleitorál husi Partidu UNDERTIM ne’ebé hala’o iha Merkadu Munisipál Liquiça hetan seguransa másimu husi Polísia Nasionál Timor-Leste (PNTL) inklui observador sira hanesan CNE, RENETIL no seluk tan.
Notísia relevante:UNDERTIM hakarak moderniza merkadu munisipál Liquiça
Jornalista : Cidalia Fátima
Editór : Florencio Miranda Ximenes
