MANATUTO, 29 abríl 2023 (TATOLI)—Administradór Munisípiu Manatuto, Bernardo Lopes, hateten aldeia lima (5) hosi suku sira iha Manatuto seidauk asesu eletresidade tanba la asesu Estrada ka dalan ba sira-nia fatin.
Notísia Relevante: Aldeia 40-resin iha Manatuto seidauk asesu bee-moos
“Ita Manatuto ne’e maiória asesu ona eletresidade, iha aldeia lima mak seidauk asesu eletresidade tanba dalan ladi’ak. Maibé, ita nafatin esforsu atu oinsá komunidade bele asesu hotu,” nia dehan ba Agência Tatoli iha nia kn’ar fatin, foin lalais ne’e.
Nia hateten, foin lalais ne’e aldeia tolu ne’ebé inaugura ona asesu eletrisidade no komunidade asesu ona, aldeia ida iha postu Soibada, ida iha Manatuto Vila no seluk iha postu administrativu Barique nian.
“Aldeia ualu mak seidauk asesu maibé foin semana hira liubá ita inaugura tan ona aldeia tolu no ita-nia povu hahú asesu ona, maibé ba aldeia lima ne’e ita nafatin tau ajenda nune’e povu hotu bele hetan naroman,” nia dehan.
Maibé, nia hateten, tinan ne’e sei dada fiu eletrisidade tan maibé tenke hadi’a uluk dalan, nune’e bele tula riin eletresidade no aldeia lima ne’e iha liu área rurál.
Totál populasaun Manatuto hamutuk 50.989 ne’ebé hela namkari iha postu administrativu Soibada, Laleia, Laclo, Laclubar, Barique no Manatuto Vila.
Jornalista : Osória Marques
Editór : Cancio Ximenes
