APMT valoriza kultura no lisan hodi hametin unidade nasionál
MANATUTO, 29 abríl 2023 (TATOLI)—Sekretáriu Jerál Partidu Asosiasaun Populár Monarkia Timorense (APMT), Shobari Guterres Nunes, hateten APMT nia planu atu aposta kultura Timor nian ba programa prioridade no oinsá atu valoriza no dignifika Timor nia lisan hodi hametin unidade nasionál.
Notísia Relevante: APMT aposta iha diversifikasaun ekonómika hodi subtitui Fundu Petrolíferu
“APMT nia programa prioridade ida mak hakarak aposta kultura, oinsá valoriza no dignifika ita-nia lisan no kultura Timor nian. Ida-ne’e, APMT nia programa ne’ebé ho nia filozofia katak ho lisan ita hametin unidade nasionál, haburas demokrásia iha prosesu dezenvolvimentu iha ita-nia rain,” Shobari Guterres Nunes hateten iha kampañia ho tipu door-to-door iha área Obratu, Manatuto, sábadu ne’e.
Shobari Guterres hatutan, bainhira APMT aposta programa kultura mak presiza iha infraestrutura bázika tenke to’o iha knua ka uma lisan sira tanba fatin lulik sira-ne’e bele dezenvolve sai hanesan fatin turizmu kulturál.
“Tanba ne’e, infraestrutura bázika tenke to’o iha ita-nia foho antigu sira, ita-nia knua, uma lisan, no to’o iha ita-nia sasán klásika sira no fatuk-lulik, bee-lulik no rai-lulik sira hodi dezenvolve sai fatin turizmu kulturál,” nia dehan.
Nia dehan, APMT hakarak promove no dezenvolve setór turismu ba fatin sira-ne’ebé mak sai turizmu relijiozu hanesan foho Ramelau, Foho Matebian no Lifau iha Rejiaun Administrativa Espesiál Oé-Cusse Ambeno (RAEOA).
“Ita dezenvolve foho Ramelau ne’e sai fatin turizmu relijiozu no sai fatin beleza. Ita tau jestór ne’ebé di’ak, nune’e vizitante sira bele vizita ho dignu mak tenke kria dormitóriu, kafetária, no restaurante. Maibé, estrada tenke tama, bee-moos tenke iha, eletresidade tenke iha, cleaner tenke iha no tenke tau seguransa, nune’e ita bele hetan reseita hosi ne’ebá, Ita labele garante de’it mina tanba tinan 30 ka 40, mina sei maran.
Aleinde ne’e, nia hateten, APMT mós aposta bee-moos hodi dezenvolve no sai fatin turizmu ekolójiku tanba ida-ne’e halo hodi atrai vizitante lokál no Internasionál.
Programa seluk, nia dehan, hanesan saúde, edukasaun, agrikultura, peska, pekuária no seluk tan ne’e iha ona Programa Dezenvolvimentu Nasionál 2011-2030 nian, la’ós programa partidu nian, nune’e partidu APMT nian mak kultura, turizmu, infraestrutura bázika, kombate dezempregu hodi harii no loke kampu traballu ba joven sira.
Jornalista : Osória Marques
Editór : Cancio Ximenes
