CASDT promete uza fundu mina-rai hakbiit povu nia ekonómia
COVALIMA, 29 abríl 2023 (TATOLI)– Prezidente Partidu Centro Ação Social Democrática Timorense (CASDT), Isaac do Rosário, promete bainhira povu fó fiar iha eleisaun parlamentár mak CASDT sei uza osan fundu mina-rai hakarak hakbiit povu nia ekonómia.
Notísia Relevante: CASDT defende polítika desentralizasaun administrativa no podér lokál
“Covalima poténsia boot ba mina-rai, fatór ne’ebé importante riku-soin hosi Timor-Leste nian, sei asegura mina-rai hanesan riku-soin ida-ne’ebé lori rendimentu ekonómia mai Timor-Leste hodi hakbiit ekonomia ba povu sira-ne’ebé durante ne’e halerik hela hodi moris di’ak ba futuru iha nasaun ida-ne’e,” Isaac do Rosário hato’o promesa ne’e iha kampaña eleitorál ho tipu mini kampaña iha suku Debos, postu administrative Suai, munisípiu Covalima, sábadu ne’e.
Aleinde ne’e, CASDT sei hakbiit povu nia ekonómia no sei fó prioridade mós ba labarik sira ne’ebé faan sasán iha dalan ninin hodi tulun ekonómia uma laran, tanba ekonómia família fraku nune’e labarik sira labele asesu ba edukasaun.
“Traballu infantil labarik sira-ne’ebé faan sasán iha dalan ninin, tanba haree ekonómia familia ne’e fraku tebes ho sira faan sasán iha dalan ninin hodi lakon sira-nia tempu atu ba eskola. Tuir lolos atu sustenta família ida-ne’e, inan-aman sira-nia responsabilidade nune’e labele husik ita-nia oan sira faan sasán iha dalan ninin,” nia dehan.
Prezidente Partidu CASDT ho númeru sorteiu 13 ne’e haktuir, labarik sira mak futuru ba nasaun nune’e sira tenke foku ba eskola atu lori dezenvolvimentu Timor-Leste ba oin, la’ós faan sasán hodi sustenta ekonómia família.
Atividade kampaña eleitorál ho tipu mini kampaña ne’e observa hosi Komisaun Nasionál Eleisaun (CNE-sigla portugés) no Provedoria Direitu Humanus no Justisa (PDHJ) no hetan seguransa hosi PNTL Covalima.
Jornalista : Celestina Teles
Editór : Cancio Ximenes
