CNE Viqueque rejista krime tolu durante kampaña loron-10
VIQUEQUE, 29 abríl 2023 (TATOLI)–Komisaun Nasionál Eleisaun (CNE, sigla portugés) Viqueque, hamutuk ho Autoridade Polísia Nasionál Timor-Leste (PNTL) no koordenadór partidu polítiku, sábadu ne’e, halo avaliasaun kampaña durante loron-10 hodi komunika ba malu.
“Durante kampaña loron 10 nian laran iha munisípiu Viqueque, rejista kazu krime tolu, iha loron 21 abríl ema deskoñesidu tuda eleitór sira iha área Loi-hubu postu Ossu, akontese mós iha suku Makadique, no iha loron 27 abríl akontese iha suku Afaloikai hodi rezulta eleitór na’in-rua kanek no uma ida hetan estragu,” Komisáriu destakadu munisípiu Viqueque, Olávio da Costa Monteiro, hateten durante atividade avaliasaun ne’ebé realiza iha salaun CNE, Beloi, postu Viqueque Villa.
Iha biban ne’e, reprezentante CNE hato’o ba partisipante katak atividade avaliasaun ne’e importante atubele fó hanoin ba malu hodi parte hotu bele asegura kampaña eleitorál ho pás no trankuilidade, evita buat ne’ebé la espera no akribi violénsia ne’ebé prejudika ema seluk nia direitu.
Notísia relevante : Konfrontu iha Uatolari rezulta uma hitu hetan estragu no vítima 16
Durante kampaña, CNE nota iha labarik barak partisipa no balun uza atributu partidu, maski autoridade seguransa no autoridade eleitorál fó sai ona regra ne’ebé bandu lori labarik sira. Tanba ne’e, Komisáriu CNE bolu atensaun ba líder partidu polítiku sira hodi kompreende prosesu kampaña eleitorál.
“Ita tenke hatene saida mak prosesu kampaña eleitorál, ita ba konta istória ka ita ba hatun malu ka hasa’e malu. Ita tenke intende kampaña eleitorál, promove kandidatu ba juventude sira no ko’alia programa. Karik aban bain-rua hetan votu hodi indijita Primeiru-Ministru, ida-ne’e mak importante ba partidu polítiku sira,” nia akresenta.
Olávio da Costa husu líder partidu sira bainhira sa’e ona palku tenke foku ko’alia ba programa tinan-lima no asuntu ne’ebé liga ba povu nia moris di’ak nune’e bele atrai eleitór bele hili.
“Durante CNE halo supervizaun ba kampaña eleitorál, iha buat barak maka ami hakerek no observa katak iha partidu lubuk ida maka ko’alia oitoan kona-ba programa no ko’alia barak maka hatún malu, depois halo diskriminasaun ba ema ne’ebé laiha ligasaun ba partidu. Ami sei haree ba irregularidade sira-ne’ebé akontese no sei notifika ba líder partidu polítiku sira atubele tau konsiderasaun,” nia hato’o.
Nune’e, nia husu ba oin to’o kampaña ramata iha loron 18 maiu, prevene hatún malu, labele halo deskriminasaun ba malu no labele provoka violénsia.
Iha fatin hanesan, Komandante PNTL munisípiu Viqueque Superentendente, Sebastião Alves Quintão, husu líder partidu polítiku sira hodi fó hanoin ba militante no simpatizante sira atu respeita malu no respeita mós autoridade seguransa.
“Iha kampaña eleitorál ne’e, ha’u hakarak ema la’o ho livre no labele iha ameasa ruma to’o iha loron votasaun 21 maiu 2023. Ida-ne’e maka ami hakarak hodi bele garante estabilidade. Ha’u apela ba líder sira fó hanoin ba militante sira, liu-liu iha loron votasaun ema labele hemu tua hodi halo perturbasaun ba ordén públiku sira,” nia fó hanoin.
Iha atividade avaliasaun ne’e partisipa hosi koodernadór partidu polítiku munisípiu Viqueque hamutuk ualu inklui ofisiál supervizaun CNE Viqueque, enkuantu koordenadór partidu sia la partisipa.
Jornalista : Vitorino Lopes da Costa
Editora : Julia Chatarina
