CNE Manatuto nota múzika atrai labarik partisipa kampaña

MANATUTO, 30 abríl 2023 (TATOLI)–Diretór Komisaun Nasionál Eleisaun (CNE) munisípiu Manatuto, Paulino Soares, nota katak durante ne’e múzika mak atrai labarik sira partisipa kampaña.

“Labarik sira akompaña tanba múzika mak atrai no lori sira mai iha ne’e, tanba ita haree ambiente ne’ebé halo kampaña ne’e iha komunidade nia le’et. Nune’e bainhira múzika lian labarik ida-idak mai haree no rona,” Paulino Soares hateten ba Agência Tatoli bainhira halo observasaun ba kampaña partidu União Democrático Timorense (UDT) iha área Ailili, munisípiu Manatuto, domingu ne’e.

Notísia relevante : CNE Manatuto identifika viatura Estadu hasai xápa matríkula iha kampaña KHUNTO

Nia konsidera, kondisaun ne’e la’ós problema boot no la kontra regra kampaña eleitorál.

“Ami haree labarik sira ne’e la’ós mai partisipa kampaña maibé tanba rame mak lori sira mai. Ba ami CNE Manatuto katak kampaña UDT la’o ho di’ak, laiha viatura Estadu no laiha liafuan insulta malu,” nia dehan.

Atividade kampaña partidu UDT hetan observasaun hosi CNE Manatuto, monitorizasaun hosi Provedoria Direitu Umanu no Justisa (PDHJ, siga portugés), inklui hetan seguransa másimu hosi Polísia Nasionál Timor-Leste (PNTL).

Jornalista     : Osória Marques

Editór            : Cancio Ximenes