DILI, 01 maiu 2023 (TATOLI) – Diretór Servisu Edukasaun Munisípiu Aileu, Carlito Pereira, hatete estudante bolsa méritu hamutuk 176 iha Aileu seidauk iha konta bankária.
“Ita iha totál alunu hamutuk 688 mak tama iha kategoria nu’udar estudante bolsa méritu. Agora na’in-512 maka loke ona sira-nia konta bankária no falta 176 mak sei kompleta sira-nia dokumentu atu hetan konta bankária iha Banku Nasionál Komérsiu Timor-Leste [BNCTL]”, Carlito Pereira informa ba Tatoli, iha Balide, segunda ne’e.
Nia dehan nu’udar autoridade edukasaun munisipál nafatin alerta ba estudante sira ne’ebé seidauk iha konta bankária atu prosesa lalais, nune’e ministériu bele aselera prosesu pagamentu ba sira.
“Ami halo ona aprosimasaun ho estudante ne’ebé seidauk iha konta bankária. Sira ne’e kuaze enfrenta difikuldade iha rekizitu sira mak hanesan idade seidauk to’o atu hetan billete identidade no kartaun eleitorál”, nia esplika.
Maibé iha alternativu seluk ne’ebé uza hodi hetan konta bankária ne’e maka utiliza dokumentu família nian hanesan inan-aman ka ema ne’ebé sira hela ba. “Estudante balun sira-nia inan aman mate ona no hela ho família ka avó sira, maibé idade ona labele la’o atu bá trata dokumentu. Tanba ne’e maka to’o agora sei impede hela sira ne’e seidauk hetan konta bankária”, esplika.
Ho situasaun ne’e, dirijente refere husu nafatin atu sira esforsu tanba dalan atu hetan sira-nia diretu ba subsídiu bolsa méritu ne’e maka liuhosi loke konta bankáriu, nune’e bele halo transferénsia osan. Tuir akordu ne’ebé MEJD halo ho BNCTL, sei lahalo pagamentu direta, maibé liuhosi prosesu transferénsia osan ba ida-idak nia konta.
Nia afirma mós katak hosi estudante 512 ne’ebé iha ona konta bankária ne’e depois ministériu halo filafali konfirmasaun iha estudante lubuk ida maka nia naran ne’ebé iha konta bankária ne’e latuir naran ne’ebé rejista iha Ministériu Edukasaun, tanba ne’e husu ba estudante sira atu hadi’ak filafali naran sira ne’e.
“Ami simu fali naran estudante balun nian hosi ministériu no husu hadi’a filafali tanba naran estudante sira-nia ne’ebé rejista iha livru boot ministériu nian lahan malu ho naran iha konta bankária. Tanba ne’e ami kontinua halo esforsu hodi husu ba profesór sira atu haree filafali kestaun ne’e”, nia realsa.
Notísia relevante: MEJD sei aselera pagamentu ba benefisiáriu bolsa méritu ne’ebé iha ona konta bankária
Jornalista: Tomé Amado
Editora: Maria Auxiliadora
