DILI, 26 abríl 2023 (TATOLI) – Ministru Edukasaun, Juventude no Desportu, Armindo Maia, orienta ona dirijente sira atu aselera pagamentu ba estudante benefisiáriu bolsa méritu sira ne’ebé maka iha ona konta bankária.
“Ha’u husu ona tékniku sira atu hala’o serbisu ho responsabilidade atubele rezolve asuntu ne’e ho lalais, nune’e iha tempu badak bele halo pagamentu ba estudante sira ne’ebé maka iha ona konta bankária”, ministru Armindo Maia hatete ba Tatoli, iha Palásiu do Governu, kuarta ne’e.
Ba estudante benefisiáriu sira ne’ebé iha ona konta bankária, ministru garante katak sira-nia lista laiha ona problema, nune’e tenke hahú ona prosesu transferénsia osan ba konta bankária. “Tanba pagamentu ba benefisiáriu bolsa méritu ne’e kle’ur liu ona, espera katak molok mandatu Governu ne’e termina, sira ne’e bele hetan ona sira-nia direitu”, nia realsa.
Governante ne’e mós haktuir katak ba estudante benefisiáriu sira ne’ebé seidauk iha konta bankária, Ministru Edukasaun sei fó nafatin oportunidade ba sira hamutuk ho família atu kontinua rezolve sira-nian prosesu administrasaun ho Banku Nasionál Komérsiu Timor-Leste (BNCTL, sigla portugés) to’o bele hetan hotu sira-nian konta bankária.
Daudaun ne’e, faze reklamasaun ba bolsa méritu nian finaliza ona no sei halo publikasaun naran iha Jornál Repúblika.
“Ha’u husu ba ekipa sira atu nafatin fó atensaun ba reklamasaun hosi benefisiáriu sira no tenke konfirma didi’ak ho manuál bolsa méritu nian bainhira deside buat ruma labele soke malu ho manuál ne’ebé iha”, nia husu.
Membru Governu ne’e mós relata katak maske nia orienta ona atu aselera prosesu pagamentu ba estudante benefisiáriu sira, maibé seiduak hatene loloos númeru alunu hira mak iha ona konta bankária tanba sei iha hela prosesu verifikasaun.
Tuir dadus Ministériu Edukasaun, benefisiáriu ba bolsa refere iha territóriu hamutuk 13.517 ne’ebé sei selu tuir nivel eskolaridade no sei tuir mós ninia kritériu sira ne’ebé maka konsagra ona iha manuál pagamentu bolsa méritu nian.
Notísia relevante: MEJD sei simu reklamasaun bolsa méritu hosi 24 marsu-08 abríl
Jornalista: Tomé Amado
Editora: Maria Auxiliadora
