KHUNTO investe rekursu umanu no hasa’e salariu mínimu ba traballadór
OÉ-CUSSE 01 maiu 2023 (TATOLI) – Partidu Kmanek Haburas Unidade Nasionál Timor-Oan (KHUNTO), liderada Armanda Berta do Santos, segunda ne’e realiza kampaña eleitorál ho tipu komísiuu aberta realiza iha Palaban, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Prezidente Partidu KHUNTO, Armanda Berta do Santos, iha kompromisu polítika husu atu vota ba Partidu KHUNTO ho númeru sorteiu 5 iha loron eleisaun 21 fulan maiu 2023 ne’e. Tanba Partidu KHUNTO mai ho ninia programa rasik, ne’ebé maka prodús ona iha livre partidu KHUNTO nian, no daudaun ne’e distribui ona iha munisípiu 14 inklui RAEOA, tanba vizaun no misaun ne’ebé iha, hakarak harii sosiedade ida-ne’ebé livre, demokrasia no iha fé esperánsa no kariedade.
Tuir lidér partidu KHUNTO ne’e katak, ho visaun no misaun ne’ebé iha, hakarak valoriza valór sosiál tradisionál tuir orijen ema timoroan nian, partidu KHUNTO mai ho nia programa sira durante ne’e implementa ona ba povu Timor-Leste.
“Bainhira povo fó fiar mai partidu KHUNTO, maka ami sei fó kbiit tomak hodi haree iha setór hot-hotu, liuliu ba setór edukasaun, saúde infraestrutura no ekonómia, primeiru pás-estabilidade no relasaun internasionál, defeza investimentu kapitál dezenvolvimentu umanu ba setór rekursu umanu, ida ne’e importante, ita haree ba seguransa nasionál, reforma plataforma seguransa interna, relasaun internasionál no polítika esterna importante iha ita-nia nasaun, dezenvolvimentu kapitál sosiál inklui ba setór saúde edukasaun ba ensinu pré-eskolár, ensinu báziku no mós kultura, animasaun, inkluzaun no protesaun sosiál importante iha Timor-Leste,” Prezidente Partidu KHUNTO, Armanda Berta do Santos, deklara iha Oé-Cusse.
Nia apela ba militante no apoiante sira, bainhira depozita konfiansa ba Partidu KHUNTO hodi lidera nonu Governu liuhosi eleisaun lejizlativa períodu 2023 to’o 2028, sei dezenvolve setór ekonomia no empregu hodi aumenta saláriu mínimu ba traballór no apoia mós formasaun no kapasitasaun.
“Ita haree ba dezenvolvimentu ekonomia no empregu, ne’e ba setór komérsiu indústria, setór privadu empregu no traballadór, ha’u la presiza esplika klaru tanba programa hirak-ne’e trata iha livru partidu nian, sekarik partidu KHUNTO imi hotu fó fiar aumenta tán kadeira sei implementa programa di’akliu ba povu Timor-Leste,” nia katak.
“Ita haree ba empregu no traballadór, primeiru Partidu KHUNTO povu fó fiar nafatin sei aumenta ba saláriu mínimu iha Timor-Leste, tanba saláriu mínimu iha ita-nia rai seidauk dignu ba ita-nia traballadór sira,” nia afirma.
Notisia relevante: PDC prioritiza infraestrutura bázika no oferese elétrika gratuita ba Povu
Jornalista: Abílio Elo Nini
Editór: Evaristo Soares Martins
