PD hakarak halo revizaun ba saláriu traballadór bainhira kaer ukun
VIQUEQUE, 01 maiu 2023 (TATOLI)—Prezidente Partidu Demokrátiku (PD), Mariano Asanami Sabino, promete bainhira kaer ukun, sei hadi’a povu nia moris no kria kampu serbisu, tanba ne’e hakarak halo revizaun ba saláriu mínimu ne’ebé foin lalais Governu hasa’e ona hosi $115 ba $135.
“Ami esforsu karik manán, hakarak hadi’a mós traballadór sira-nian saláriu. Nune’e mós ami sei haree kampu serbisu iha rai-laran atu ema asesu serbisu. Governu tenke dignifika no hasa’e saláriu mínimu traballadór ba $200,” Mariano Asanami hateten durante kampaña iha kampu futeból, iha postu Viqueque Villa, segunda ne’e.
Notísia relevante : PD hakarak fó espasu ba joven sai inovadór no kreativu
Aleinde ne’e, PD mós iha programa hadi’a estrada no moderniza setór agrikultura iha munisípiu Viqueque.
“Kondisaun estrada liga iha Viqueque tantu ba postu sira kuaze ho kondisaun a’at. Ami asiste ona estrada sira-ne’e a’at iha Timor laran tomak. Ami hosi postu Bagia mai postu Uatucarbau a’at tebes. Tanba ne’e bainhira PD ba ukun sei kontinua haree dezenvolvimentu infraestutura hodi povu bele asesu no lori produtu ba merkadu inklui dezenvolve setór agrikultura sai modernu liu-liu iha Viqueque ne’ebé poténsia ba setór agrikultura,” nia akresenta.
Nune’e mós, PD hakarak proteje no defende ema ho difisiente sira inklui ferik katuas sira-nia direitu iha Parlamentu Nasionál.
“PD kompromete bainhira hetan fiar, hakarak hasa’e osan idozu ba $100. Aleinde ne’e, sei fó kréditu ba estudante sira ne’ebé eskola ba lisensiatura, mestradu no doutoramentu sira hala’o sira-nia estudu no bainhira sira ramata estudu, serbisu ona maka selu 1% to’o 5% ba Estadu,” nia tenik.
Entretantu, atividade kampaña ne’e hahú tuku 15:00 to’o 17:00, ne’ebé hetan partisipasaun hosi militante no simpatizante hosi postu Ossu, Lacluta no Viqueque Villa. Hetan seguransa hosi Polísia Nasionál Timor-Leste (PNTL) munisípiu Viqueque, superviziona hosi Komisaun Nasionál Eleisaun (CNE, sigla portugés) no observadór nasionál no internasionál.
Jornalista : Vitorino Lopes da Costa
Editora : Julia Chatarina
