DILI, 01 maiu 2023 (TATOLI)—Primeiru-Ministru (PM), Taur Matan Ruak, konsidera traballadór nu’udar eroi foun iha dezenvolvimentu nasaun nian.
“Traballadór sira nu’udar eroi foun iha faze dezenvolvimentu nasionál daudaun ne’e no liuhosi sira mak ita harii nasaun ne’ebé forte, riku no seguru. Parabéns ba ita-boot sira-nia profisaun, forsa, orgullu no dedikasaun sira hodi ita hamutuk tau forsa lori ita-nia nasaun ba oin,” PM Taur hateten liuhosi nota ne’ebé Agência Tatoli asesu, segunda ne’e.
Notísia relevante : Prezidénsia Repúblika husu Governu proteje traballadór nia direitu iha “May Day”
Nasaun iha mundu tomak inklui Timor-Leste, iha loron 01 maiu 2023, selebra loron internasionál traballadór nian, ne’ebé komunidade katólika mós selebra nu’udar loron São José Operário, ho objetivu atu rekoñese no valoriza kna’ar traballadór sira iha sosiedade.
Tuir Xefe Governu, loron traballadór la’ós de’it feriadu ka loron deskansa, maibé sai nu’udar biban di’ak tebes atu hahí empeñu, méritu, disiplina, profisionalizmu, serbisu iha ekipa, espíritu sakrifísiu no kumprimentu dever ne’ebé horik nafatin iha traballadór sira tantu nasionál nune’e mós estranjeiru sira, ne’ebé habelar iha setór oin-oin hosi ekonomia no administrasaun públika, ne’ebé kontribui maka’as ba produtividade país bele hakat ba oin iha ritmu di’ak.
PM subliña traballadór sai nu’udar bensaun no rikusoin loloos hosi família, komunidade, empreza, instituisaun ka nasaun ida, tanba ne’e justu atu banati ezemplu di’ak hosi traballadór sira-nia serbisu, hanesan fonte enkorajamentu no inspirasaun hodi hasoru dezafiu dezenvolvimentu.
“Ba traballadór timor-oan no estranjeiru hotu-hotu ne’ebé kontribui ho laran tomak ba Timor-Leste ne’ebé modernu, dezenvolvidu no prósperu liután, ha’u hakarak tebes hodi ha’u nia nia naran rasik no VIII Governu nia naran, hato’o ami-nia agradesimentu boot tebes,” Taur apresia.
Jornalista : Antónia Gusmão
Editora : Julia Chatarina
