iklan

NASIONÁL, ELEISAUN, HEADLINE

CNE apela ba líder arte-marsiál no rituál kontrola membru durante tempu kampaña

CNE apela ba líder arte-marsiál no rituál kontrola membru durante tempu kampaña

Prezidente CNE, José Belo, ho ekipa hala'o konferénsia imprensa hodi hato’o informasaun kona-ba Balansu Eleisaun Parlamentár 2023, iha sentru mídia CNE, Colmera, tersa (02/05/2023). Imajen Tatoli/Francisco Sony

DILI, 02 maiu 2023 (TATOLI)–Komisaun Nasionál Eleisaun (CNE, sigla portugés) apela ba líder arte-marsiál no arte-rituál atu kontrola didi’ak membru sira hodi labele utiliza grupu nia naran iha palku polítiku durante kampaña eleitorál.

Informasaun ne’e entidade CNE hasai relasiona ho grupu balun utiliza atributu arte-marsiál no arte-rituál hodi halo afiliasaun ba partidu polítiku balun durante atividade kampaña, maski lei bandu lori atributu grupu envolve direta iha atividade partidária.

“Palku ne’ebé iha ne’e hanesan palku ba kampaña eleitorál, labele fó fali palku ba individuu balun inklui arte-marsiál reprezenta arte-marsiál ida hodi afilia fali ba partidu seluk tanba ne’e nu’udar parte hosi akontesimentu krime eleitorál. Ami rejista ona no notifika ona, se partidu ida-ne’e nafatin utiliza momentu sira hanesan ne’e, husu ba KRAM, responsável partidu no arte-marsiál katak lei vigora ona no ami sei foti medida, bele mós apresia hodi submete ba Ministériu Públiku tanba mosu situasaun dezobidiénsia,” Prezidente CNE, José Belo, hateten liuhosi konferénsia imprensa, iha sentru mídia CNE, Colmera, tersa ne’e.

Notísia relevante : CNE konsidera konfrontu ParPol iha Viqueque la’os krime eleitorál  

Prezidente CNE, José Belo. Imajen Tatoli/Francisco Sony

Responsável órgaun eleitorál ne’e fó hanoin ba partidu polítiku sira katak bainhira halo kampaña fó sai de’it programa, labele utiliza fali arte-marsiál nu’udar objetivu kampaña.

“Ami rejista hela, akontese iha munisípiu Baucau no Manatuto, husu ba sira atubele haree ida-ne’e, sé de’it bele partisipa iha kampaña maibé nu’udar eleitór, labele utiliza atributu arte-marsiál,” nia tenik.

José Belo haktuir, durante kampaña eleitorál partidu balun iha Baucau iha membru organizasaun arte-marsiál hosi Persaudaraan Setia Hati Terate (PSHT) no Ikatan Kera Sakti (IKS) deklara lori arte-marsiál nia naran afilia ba partidu refere.

“Ami lee mós sira-nia estatutu katak iha ne’ebá la hateten afilia ba partidu A ka B. Tanba temi prezidente IKS ho PSHT, entaun ami husu ba prezidente grupu rua ne’e tenke halo disiplina ba ninia membru, sira hanesan líder tenke kontrola, labele grupu kiik-oan ida lori naran organizasaun ba fali halo polítika. Organizasaun ema hotu respeita,” nia bolu atensaun.

Nune’e, Prezidente CNE konsidera hahalok hirak ne’e kontribui aktu krime ne’ebé komete hosi líder partidu, kuadru, militante no simpatizante ba aktu krime eleitorál ne’ebé estipula iha artigu 229 to’o artigu 242 iha Kódigu Penál Timor-Leste.

Órgaun eleitorál ne’e informa no notifika katak, atividade kampaña eleitorál sei hela tan loron 16 atu to’o ba loron 18 maiu. Tanba ne’e CNE husu líder partidu polítiku inklui kuadru sira atu nafatin kumpre regra kampaña atubele konkorre iha Eleisaun Parlamentár períodu 2023-2028.

CNE ezerse kompeténsia servisu aktu eleitorál tuir termu ne’ebé atribui iha Konstituisaun RDTL, artigu 65, númeru 6, no tuir disponizasaun kompeténsia sira iha alinea a, númeru 1, artigu 8, lei númeru 16/2021, 28 jullu, lei ba Órgaun Administrasaun Eleitorál, alterasaun datoluk ba lei númeru 5/2006, 28 dezembru, hateten katak kompete ba CNE halo supervizaun ba resenseamentu eleitorál no aktu eleitorál sira hotu, inklui referendáriu iha Timor-Leste.

Ho baze hodi atribuisaun legál sira ne’e mak CNE halo supervizaun ba aktu eleitorál Eleisaun Parlamentár 2023.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!