AILEU, 28 abríl 2023 (TATOLI) – Prezidente Komisaun Nasionál Eleisaun (CNE, sigla portugés), José Belo, hateten konfrontu entre militante Partidu Polítiku (ParPol) ne’ebé akontese iha Postu Administrativu Uatulari, Munisípiu Viqueque kinta (27/4) horseik ne’e hanesan asaun individu.
“Ha’u hanoin konfrontu ne’e la’os entre militante ho militante partidu polítiku maibé ida ne’e individu ne’ebé tau mós ekipamentu (atributu) hanesan farda ho faru balun Fretilin, balun CNRT, tanba ne’e ba kazu ne’e investigasaun la’o, sei hatudu sé mak komete, kuandu sala tenke bá responde”, José Pereira Belo hateten ba jornalista sira hafoin remata partisipa serimónia inagurasaun edifísiu CNE Munisípiu Aileu ne’ebé halao iha Suku Aissirimou, Postu Administrativu Aileu Vila, Munisípiu Aileu.
Nia dehan, ho situasaun sira hanesan, CNE nafatin iha kordenasaun ho partidu polítiku sira atu nafatin mantein kalma.
“Atu husu sira-nia militante sira kontribui ba estabilidade no labele halo asaun ne’ebé kontribui ba buat ida la edukativu”, José Belo hateten.
Tuir nia, bainhira problema mosu ne’e, julga mak partidu dehan partidu mak organiza maibé ida ne’e hanesan ne’e asaun ida ke voluntáriu.
“Ita presiza buka hatene, ita investiga uluk tanba liuhosi investigsaun mak sei hatudu, sé mak komete kuandu sala tenke ba responde”, nia afirma.
Prezidente CNE informa, hahú hosi abertura kampaña hosi loron 19 fulan abríl to’o 28 abríl CNE seidauk rejista kazu krime eleitorál grave.
Nia dehan, iha mosu faillansu maske iha asidente no insidente balun maibé ne’e la’os krime eleitorál tanba polísia ho CNE nafatin koopera hodi servisu ho partidu sira kontroladu nafatin militante sira.
“Ita haree ba krime grave seidauk iha, iha duni asidente no insidente sira ne’e liga ba partidu muda kalendáriu dalaruma laiha kordenasaun ho CNE no polísia halo ami preokupa tanba liga ba kestaun konstrolu ita konsege rezolve, ita seidauk iha ameasa bo’ot ka iha konflitu ida espera katak nafatin mantein ho situasaun ne’e atu kampaña la’o di’ak to’o 19 maiu”, nia konklui.
Jornalista: Natalino Costa
Editór : Zezito Silva
