DILI, 02 maiu 2023 (TATOLI)–Komisaun Nasionál Eleisaun (CNE, sigla portugés) husu ba membru hosi instituisaun Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ka individuu ne’ebé fó seguransa ba líder partidu polítiku atu labele envolve direta no indireta iha atividade kampaña eleitorál.
“Husu ba parte seguransa liu-liu sira ne’ebé hanesan eskoltu ba ita-nia líder sira, tanba lei dehan katak sira iha direitu atu hetan mós eskoltu maibé husu ba sira atu respeita no tau faru karik labele utiliza uniforme militár ka polísia nian, sira mós labele utiliza fali faru ka ekipamentu mai hosi partidu nune’e ami haree katak sira-nia funsaun ne’e atu fó seguransa no tenke respeita regra katak tenke neutru no respeita lei sira ne’ebé vigora,” Prezidente CNE, José Belo, hateten liuhosi konferénsia imprensa iha sentru mídia, CNE tersa ne’e.
Liga ho asuntu ne’e, CNE sei notifika instituisaun ne’ebé membru hirak ne’e haknaar-an ba.
“Karik membru F-FDTL notifika ba F-FDTL, sé membru PNTL ita notifika la’ós lori naran instituisaun maibé sira bainhira tama iha kampaña laran dala-ruma hanesan seguransa no dala-ruma bele tau tiha símbolu partidu nian, tanba ne’e ami rejista katak ida-ne’e labele utiliza, sira tenke tau pozisaun katak seguransa no labele basa liman, sira firme nune’e iha buat ruma atake ba líder sira,” nia akresenta.
Notísia relevante : CNE apela ba líder arte-marsiál no rituál kontrola membru durante tempu kampaña
Durante akompaña prosesu kampaña, nia nota mós katak pesoál balun ne’ebé la’ós ona membru ativu militár sei utiliza nafatin sira-nia fotografia militár hodi hatudu iha ámbitu kampaña eleitorál.
“CNE rejista hotu no halo aprosimasaun ba sira atu sira kompreende katak ba kampaña ne’e lori atributu bandeira partidu nian no programa. Aktu sira ne’e akontese dala-ruma sira hatene no dala-ruma sira la hatene no seluk fali sira hakarak duni atu uza,”Prezidente CNE tenik.
CNE ezerse kompeténsia servisu ba aktu eleitorál tuir termu sira ne’ebé atribui iha Konstituisaun RDTL, artigu 65, númeru 6, no tuir disponizasaun kompeténsia iha alinea a, númeru 1, artigu 8, Lei númeru 16/2021, 28 jullu, kona-ba lei ba Órgaun Administrasaun Eleitorál, alterasaun datoluk ba lei númeru 5/2006, 28 dezembru, hateten katak kompete ba CNE halo supervizaun ba resensiamentu eleitorál no aktu eleitorál sira hotu, inklui referendáriu iha Timor-Leste. Ho baze atribuisaun legál sira ne’e mak CNE halo supervizaun ba aktu eleitorál iha Eleisaun Parlamentár 2023.
Jornalista : Antónia Gusmão
Editora : Julia Chatarina
