Diretór STAE Viqueque preokupa dalan liga bá sentru votasaun seidauk normaliza
VIQUEQUE, 02 maiu 2023 (TATOLI)—Diretór Sekretariadu Tékniku Administrasaun Eleitorál (STAE) Viqueque, Humberto fernandes, preokupa ho kondisaun dalan ne’ebé liga bá sentru votasaun ho kondisaun grave, nune’e sei difikulta ekipa halo distribuisaun ba matéria sensitivu no naun sensitivu bá fatin votasaun.
“Daudaun ne’e dalan liga bá sentru votasaun sira balun kotu difikulta karreta sira liu, nune’e tempu halo distribuisaun matéria bá fatin votasaun sei difísil tanba kondisaun dalan. Maski antes ne’e ami halo identifikasaun dalan liga bá sentru votasaun sira hodi submete pedidu ba Governu atu halo normalizasaun, maibé to’o agora seidauk iha resposta ruma ba pedidu ne’ebé maka ami hato’o,” Diretór hato’o preokupasaun ne’e ba Agência Tatoli, iha ninia knaar fatin, Beloi, postu Viqueque Villa, tersa ne’e.
Notísia relevante : Autoriedade Viqueque husu MOP hadia dalan liga ba sentru votasaun
Aleinde ne’e, iha dalan parte postu Uatulari liga sentru votasaun neen iha Villa antiga Uatulari Atas nian, Iraler kotu iha área tolu inklui postu Ossu bá Nahareka.
“Ha’u sente kondisaun dalan maka sai preokupasaun tanba agora mós tempu udan, enkuantu dalan seidauk halo normalizasaun,” nia tenik.
Iha fatin ketak, Diretór Servisu Obra Públika Viqueque, Mário do Rego, hateten, sira-nia parte submete ona pedidu hadi’a dalan ba Ministériu Obra Públika (MOP) nasionál iha loron 02 fevereiru 2023, maibé to’o agora seidauk iha informasaun ruma kona-ba normalizasaun dalan ho kondisaun grave.
“Antes ne’e parte nasionál husu ba ami atu submete dadus kona-ba dalan liga bá sentru votasaun sira-ne’ebé ho kondisaun a’at, nune’e ami submete ona pedidu. Ha’u hanoin Ministru fó ona despaixu ba Institutu Jestaun Ekipamentu maka normaliza dalan sira-ne’e, maibé to’o agora la mai. Bainhira la normaliza dalan sira bá sentru votasaun ne’e ita asesu susar tebes,” nia dehan.
Antes ne’e Administradór Viqueque, Januário Soares ‘Bolly’, husu MOP hadi’a dalan sira-ne’ebé liga bá sentru votasaun sira iha Viqueque tanba kuaze ho kondisaun grave.
Dalan sira-ne’ebé munisípiu Viqueque identifika iha sentru votasaun maibé ho kondisaun a’at maka hanesan postu Uatucarbau bá suku Loi-Hulo, Afaloikai no Bahatata, postu Uatulari, área Iraler, postu Lacluta Luhan Raikuak, postu Ossu dalan liga bá suku Nahareka no Uaibobo.
Iha Eleisaun Parlamentár 2023, munisípiu Viqueque iha sentru votasaun 112 no estasaun votasaun 135.
Jornalista : Vitorino Lopes da Costa
Editora : Julia Chatarina
