Autoriedade Viqueque husu MOP hadia dalan liga ba sentru votasaun
VIQUEQUE, 19 fevereiru 2023 (TATOLI) – Adiministradór Munisípiu Viqueque, Januario Soares (Bolly), husu ba Ministériu Obras Públika (MOP) hadia dalan sira-ne’ebé liga ba sentru votasaun sira iha Munisípiu Viqueque ho kondisaun ne’ebé grave.
“Ha’u husu ba parte MOP atu hadia dalan liga ba sentru votasaun sira ne’ebé oras-ne’e kondisaun grave tebes. Iha semana kotuk ami submete ona lista dalan sira-ne’ebé ami identifika ho kondisaun aat, atu tau konsiderasaun, atu labele difikulta ba mobilizasaun materiál eleisaun nian ba sentru votasaun”, Januario Soares “Bolly”, hateten ba Agência Tatoli, iha postu Viqueque villa, sábadu.
Autoriedade Munisípiu Viqueque hatutan, dalan sira-ne’ebé identifika kondisaun aat maka hanesan Postu Uatucarbau ba Suku Loi-Hulo, Afaloikai no Bahatata, Postu Uatulari, Postu Uatulari área Iraler, Postu Lacluta Luhan Raikuak, Postu Ossu dalan liga ba Suku Nahareka no Uaibobo. Dalan sira ne’e maka tau ona ba lista tanba sentru votasaun iha hotu ne’ebá, entaun presiza hadia.
“Atu labele difikulta ba distribuisaun materiál eleisaun ba sentru votasaun, MOP presiza mobiliza Institutu Jestaun Ekipamentu, Institutu Públiku (IJE,I.P) hadia dalan sira ne’ebé ami submete ba ona MOP”, nia hato’o.
Aleinde ne’e mós nia relata, dalan Lugatoi mós kontinua sai hanesan tanba dalan Lugatoi maka kotu entaun distribuisaun materiál eleisaun ba Postu Uatulari no Uatucarbau labele liu tanba laiha dalan alternativu, submete ba hotu MOP hodi hadia.
Iha fatin seluk, Diretór Komisaun Nasionál Eleisaun (CNE-sigla portugés), Munisípiu Viqueque, Honorio da Cruz, haktuir kondisaun dalan sira ba sentru votasaun, parte kompetente presiza tau konsiderasaun hodi hadia, nune’e labele difikulta ba eleisaun parlamentár.
“Ha’u hanoin eleisaun parlamentár la’o ho di’ak, parte hotuhotu presiza fó kontribuisaun. La’os órgaun eletóral de’it hola responsabilidade, maibé ministériu relevante sira presiza fó apoiu hotu hodi susesu ba eleisaun parlamentár tinan ida-ne’e”, nia afirma.
Jornalista: Vitorino Lopes da Costa
Editór : Zezito Silva
