FRETILIN sei halo foho Laclubar sai turizmu montaña
MANATUTO, 02 maiu 2023 (TATOLI)—Partidu Frente Revolucionário de Timor-Leste (FRETILIN) ho númeru sorteiu 11, tersa ne’e, hala’o kampaña mini komísiu iha postu administrativu Laclubar, munisípiu Manatuto.
Notísia Relevante:Kampaña Liquiça: FRETILIN hakarak hadia profesór nia moris
Sekretáriu Jerál Partidu FRETILIN, Mari Bin Amude Alkatiri, hateten bainhira povu fó fiar mak FRETILIN FRETILIN hakarak halo foho Laclubar sai turizmu montaña no postu administrativu Soibada sai fatin ba turizmu relijiozu.
“Manatuto tenke iha prioridade partikulár mak buat balun ne’ebé halo hamutuk ho Laclubar no Soibada, tanba ita haree ba foho nia matak furak tebes entaun ita presiza halo turizmu oioin iha Laclubar. Laclubar halo turizmu montaña no Soibada iha turizmu relijiozu. Tanba, ita haree Manatuto hakonu ho matak,” Sekretáriu Jerál Partidu FRETILIN, Mari Bin Amude Alkatiri, hateten iha kampañia mini komísiu, iha Laclubar-Manatuto.
Sekretáriu Jerál FRETILIN hateten, presiza tau prioridade ba infraestrutura mak bee-moos tenke iha. Maibé ita haree bee ba natar iha maibé falta bee-moos signifika falta infraestrutura para garante bee-moos ba uma kain ida-idak.
“Ita garante infraestrutura hodi satan bee iha tempu udan no bai-loron uza bee. Ida-ne’e mak programa prioridade Fretilin nian. Entaun, tinan lima ba oin la’o ho programa jerál maibé atu dezenvolvimentu la’o ba oin mak kada munisípiu iha programa prioridade partikulár mak halo zona espesiál aseleradu iha kada munisípiu. Foka ba dezenvolvimentu aseleradu signifika tempu badak ita tenke halo dezenvolvimentu lalais ona,” nia hateten.
Nia reforsa, dezenvolvimentu tenke aselera nune’e bele hadi’a povu nia moris no bele hasai no liberta povu hosi mukit mak ekonomia iha Timor-Leste tenke la’o.
“Dezenvolvimentu tenke la’o lalais nune’e ita hadi’a vida povu nian. Ita sei hasai povu hosi mukit mak ekonómia tenke la’o. Ho subsídiu de’it, ita sei lahasai povu hosi mukit.
Entaun, ekonómia tenke la’o mak toos na’in, natar-na’in ou haki’ak animál ne’e nia rendimentu tenke to’o ba sira-nia família hodi moris. Manán no lidera IX Governu mak Fretilin tau prioridade ba bee-moos iha Manatuto,” nia dehan.
Nia dehan, atu povu moris di’ak mak presiza hadi’a uluk infraestrutura tomak, tenke hadi’a no planu no programa sira-ne’e atu la’o tenke iha polítika dezenvolvimentu nível nasionál.
Jornalista : Osória Marques
Editór : Cancio Ximenes
