LIQUIÇA, 30 abril 2023 (TATOLI)– Partidu Frente Revolusionária Timor-Leste Independente (FRETILIN) liu husi kampaña eleitoral ne’ebé hala’o iha Munisípiu Liquiça domingu ne’e, kompremete sei hadia profesór nia moris hodi hasa’e kualidade edukasaun Timor-Leste.
Prezidente Partidu FRETILIN, Francisco Guterres ‘Lu-Olo’ liu husi nia intervensaun hateten edukasaun ho kualidade diak ba oan sira importante tebes, nune’e mak FRETILIN hakarak hametin kurikulum eskola hanesan sasukat ida hodi lori oan sira sai matenek.
“Profesór sira atu hanorin labarik tenke iha kondisaun, maibé dalabarak ha’u vizita eskola balun, kadeira ba profesór sira atu tu’ur deit mos laiha, se ita hanesan ne’e nafatin bainhira mak ita atu oferese kualidade edukasaun ida diak ba oan no povu sira,” Lu-Olo dehan liu husi nia intervensaun ba Kampaña Eleitoral iha Kampo Futebool Liquiça, domingu ne’e.
FRETILIN mós iha hanoin hodi oferese uma dignu ba profesór sira inklui eleva kapasidade profesór liu husi formasaun sira, nune’e bele iha kbiit atu akompaña no hanorin estudante husi pré-eskolar, ensinu báziku, sekundaria to’o nivel universitáriu.
Eis Prezidente Repúblika ne’e afirma FRETILIN mai hodi liberta povu husi nakukun ba naroman signifika lori povu nia oan sira sai matenek, nune’e oan sira sai sidadaun ida diak no iha valores hodi halo desenvolvimento ba rai ida ne’e.
“Atu desenvolvimentu rai ne’e lao ba oin nafatin so loloos ita nian oan sira sai matenek, iha mundu agora ema bolu mundu globalizadu ho teknolojia moderna oin-oin,” nia akresenta.
Francisco Guterres Lu-Olo nafatin husu ba militante no simpatizante husi Munisípiu Liquiça atu dala ida tan fó fiar ba FRETILIN hodi lidera governu tuir mai liu husi hili numeru 11 iha Eleisaun Parlamentar 2023 ne’ebé sei realiza iha loron 21 maiu mai.
“Hili FRETILIN atu ita labele sai estadu ditadura, tenke estadu de direitu, estadu tenke hakruk ba nia lei no konstitusaun sira, estadu de direitu lao ho nia prinsipiu, vontade povu nian boot liu, povu mak ukun nia nain, povu ne’e nain ba ukun, ukun nain mak povu hili hodi kaer ukun laos atu ba hare’e familia nia reprezenta. FRETILIN hakarak ho seriu tebes servi interese povu ida ne’e nian,” nia hakotu.
Tuir observasaun Tatoli iha tereñu, maske Ofisíal Partidu sira rasik husu ba militante no simpatizante atu labele lori labarik maibé inan aman sira rasik mak inisiativa hodi lori, alende ne’e iha mós labarik barak ne’ebé mai akompaña tanba hakarak hare’e divertimentu sira husi múzika ne’ebé toka durante kampaña lao.
Kampaña Eleitoral husi FRETILIN ne’e rasik hahu iha tuku rua lorokraik no hetan seguransa husi PNTL inklui misaun observasaun hanesan CNE, RENETIL, PDHJ no seluk tan.
Jornalista : Cidalia Fátima
Editora : Armandina Moniz
