SEII lansa PAN-VBJ iha Oé-Cusse ho estratéjia tolu
OÉ-CUSSE 02 maiu 2023 (TATOLI) – Sekretária Estadu Igualdade no Inkluzaun (SEII), Maria do Rosário Fátima Correia hamutuk Autoridade Rejiaun Administrativa Espesiál Oé-Cusse Oé-Cusse Ambeno (RAEOA), lideradu Arsénio Paixão Bano, tersa ne’e, lansa livru Planu Asaun Nasionál Kontra Violénsia Bazea ba Jéneru (PAN-VBJ) ho estratéjia tolu.
Planu nasioná ne’e estabelese ho estratéjia pilár tolu, primeiru, pevensaun violénsia hasoru feto no labarik-feto, daruak, provizaun servisu esensiál ba feto no labarik-feto, ne’ebé esperiénsia violénsia, no pilár ikusliu maka, apoia legál no justisa.
Sekretária Estadu Iguáldade no Inkluzaun (SEII), Maria do Rosário Fátima Correia, informa, implementasaun PAN-VBJ ne’e ho durasaun tinan 10, hahú iha 2023 to’o 2032, atu garante kompromisu no asaun ba tempu naruk.
Nia hatutan, tanba prevene violénsia kontra feto no labarik feto labele rezolve liuhosi estratéjia tempu badak nian, tán ne’e planu implementasaun sira-ne’ebé kobre kada períodu tinan-tinan, sei fó fleksibilidade ba Governu halo planeamentu dettallu ba durasaun sira-ne’ebé fasil liu hodi ajuda monitoriza nia progresu iha futuru.
“Lansamnetu planu nasionál ne’e atu haree área temátika tolu, ita durante ne’e implementa ba tinan haat, maibé agora nia durasaun implementa ba tinan 10, depois kada tinan ida ita halo evaluasaun, hatudu ita redús kazu ka aumenta, kazu aumenta tanba sosializasaun ba iha komunidade katak sira sensitivu ba iha kazu sira-ne’e atu relata sai sira-nia kazu, tanba kazu ne’ebé rejista aas iha Timor-Leste kazu violénsia doméstika,” Maria Rosário Fátima Correia, ko’alia iha lansamnetu ne’e.
Daudaun SEII hanoin ona atu halo revizaun ba iha lei kontra violénsia doméstika, tanba lei ne’e implementa ona durante tinan 12 nia laran, hahú 2010 to’o 2021, hosi lei ne’e, maka ohin SEII lansa tán Planu Nasionál Kontra Violénsia Bazea ba Jéneru.
Tan ne’e parte SEII nia esforsu, no espera iha futuru, Governante sira tuir mai ho estrutura foun tantu iha nível nasionál no RAEOA, bele nafatin kontinua programa saida maka implementa ba povu.
Prezidente Autoridade RAEOA, Arsénio Paixão Bano, konfirma, esforsu ne’ebé autoridade halo ba prevensaun violénsia hasoru feto no labarik feto, Autoridade RAEOA oferese ona apoia ba uma mahon sira liuliu PRADET iha Oé-Cusse Ambeno.
“Esforsu ne’ebé autoridade halo ba protesaun, ita oferese ona apoia finanseiru no transporte ba uma mahon sira, hanesan PRADET, entaun ha’u agradese ba parte SEII tanba esforsu ne’ebé halo atu prevene no akompaña oinsá luta redús kazu sira iha Timor-Leste, liuliu O’e-Cusse,” nia katak.
Notísia relevante: RAEOA-SEII selebra akordu ho objetivu haat haforsa advokasia igualdade jéneru
Jornalista: Abílio Elo Nini
Editór: Evaristo Soares Martins
