Inan isin-rua hakbesik fasilidade saúde asesu “bolsa da mãe jerasaun foun”
MANATUTO, 03 maiu 2023 (TATOLI)—Diretór Saúde Munisípiu Manatuto, Mateus Vicente Correia, husu autoridade kompetente atu informa ba inan isin-rua atu hakbesik ba fasilidade saúde hodi asesu ba programa bolsa da mãe jerasaun foun.
Notísia Relevante: Bolsa da Mãe Jerasaun Foun halo ona pagamentu ba benefisiáriu 20.560
“Husu ba autoridade kompetente atu habelar tutan informasaun kona-ba programa bolsa da mãe jerasaun foun, ba ita-nia inan isin-rua atu hakbesik ba fasilidade saúde hodi halo tratamentu no rejista iha livru LISIO, nune’e bele asesu ba programa bolsa da mãe jerasaun foun,” nia hateten ba Agência Tatoli iha nia kna’ar fatin Manatuto, kuarta ne’e.
Diretór ne’e hateten, programa ne’e iha benefísiu ba inan isin-rua, bebé no ba bebé kondisaun defisiénsia hosi tinan 0-6.
“Programa ne’e di’ak ba ita-nia inan-feton sira-ne’ebé isin-rua atu oinsá motiva sira atu konsulta fulan-fulan iha fasilidade saúde no to’o partu. Ita hakarak ne’e inan isin-rua tenke partu iha ospitál. Tanba ne’e, Governu liuhosi Ministériu Solidariedade Sosiál no Inkkuzaun hamutuk ho Ministériu Saúde hodi implementa ba munisípiu alvu sira,” nia hateten.
Tuir nia, Manatuto foin mak hahú halo rejistu ba inan-isin-rua sira iha fulan-janeiru no fevereiru 2023 no nia progresu atinje ona 60%.
“Ekipa solidariamente sosiál no saúde kontinua rejistu inan isin-rua,” nia dehan.
Munisipiu alvu ba programa bolsa da mãe jerasaun foun ba faze dahuluk mak munisípiu Ainaro, Bobonaro no Rejiaun Administrativa Espesiál Oé-Cusse Ambeno (RAEOA) no ba faze daruak mak munisípiu Manatuto, Viqueque, Liquiça no Covalima.
Jornalista : Osória Marques
Editór : Cancio Ximenes
